Abý-Dabı deklaratsııasy: Qylmysqa qarsy jahandyq josparǵa JI engizildi
ASTANA. KAZINFORM – Álemniń 119 eli Abý-Dabıde zamanaýı qylmys túrlerine qarsy kúrestiń jahandyq josparyn qabyldady, dep habarlaıdy BUU Jańalyqtar qyzmeti.
26 qyrkúıekte maquldanǵan Abý-Dabı deklaratsııasy qylmystyq maqsatta tsıfrlyq tehnologııalardy paıdalanýdyń kúsheıýine erekshe nazar aýdarady. Qujatta «qylmys qyzmet retinde» jáne «zorlyq-zombylyq qyzmet retinde» sekildi jańa úrdister atalǵan.
Memleketter sot tóreligi júıesin tsıfrlandyrýdy jáne qylmystyq sot tóreligi organdarynyń jumysyna jasandy ıntellektini engizýdi josparlap otyr. Bul rette adam baqylaýy, ashyqtyq, zań talaptaryn saqtaý jáne derekterdi qorǵaý qamtamasyz etilýi tıis.
BUU Bas hatshysynyń birinshi orynbasary Amına Mohammed ádilettilik artyqshylyq emes, ár adamnyń quqyǵyn qorǵaýy kerek ekenin atap ótti.
BUU Esirtki jáne qylmys jónindegi basqarmasynyń atqarýshy dırektory Monıka Djýma tehnologııalar qylmystyń ósýin jedeldetip qana qoımaı, onyń sıpatyn da ózgertip jatqanyn aıtty. Onyń sózinshe, qylmystyq toptar tsıfrlyq valıýtalardy zańsyz tabysty jasyrýǵa, al elektrondy quraldardy alaıaqtyq pen manıpýlıatsııa jasaýǵa paıdalanady.
Kongress 1 qazanǵa deıin jalǵasady. Oǵan 40-tan astam ádilet mınıstri jáne 5,1 myńnan astam memlekettik organdar, azamattyq qoǵam, ǵylymı orta men bıznes ókilderi qatysyp jatyr.
Aıta keteıik, BUU Bas Assambleıasynyń otyrysyna qatysqan álem elderi kóshbasshylary bolashaq pandemııalarǵa daıyndyqty kúsheıtý jónindegi mindettemelerin jańartqanyn jazdyq.
