Ábý-Dabı áýejaıynda jolaýshylar úshin tegin qyzmetter ashyldy
ÁBÝ-DABI. QazAqparat - Birikken Arab Ámirliginiń Etihad Airways ulttyq avıatasymaldaýshysy Ábý-Dabı áýejaıynda qyzmet aıasyn keńeıtip, avıkompanııa tarıhynda ushý aımaǵynda alǵash ret qonaqtarǵa arnalǵan kútý zalyn ashty.
Zal qyzmetin birinshi jáne bıznes-klass sanatyndaǵy jolaýshylar paıdalana alady. Jańa zal termınaldyń kedendik baqylaý aımaǵynyń janynda qolaıly ornalasqan.
Munda qajetti kerek-jaraqtarymen on dýsh kabınasy bar, kıim útikteý qyzmetteri kórsetiledi. Bul qyzmetter tegin, dep atap ótedi avıkompanııadan. Sondaı-aq jolaýshylar kásibı shashtarazdyń qyzmetine tegin júgine alady. Jańa kútý zalynda jaıly kreslolar men keń ekrandy teledıdarlar ornalastyrylǵan. Gazet, jýrnal, kitaptardyń túr-túri bar. Qonaqtarǵa sýsyn, tiskebasar usynylady. Aıta keteıik, Etihad Airways áýe kompanııasy Astana men Almatydan Ábý-Dabıge reısterdi júzege asyrady.
