«Ábish – Qudaıǵa, Jumeken – paıǵambardan»: Kekilbaıulyna arnaǵan qalamgerler qoltańbasy
ASTANA. KAZINFORM - 2018 jyly QR Ulttyq akademııalyq kitaphanasynda Qazaqstannyń halyq jazýshysy, memleket jáne qoǵam qaıratkeri Ábish Kekilbaıuly atyndaǵy oqý zaly ashylǵan bolatyn.
Á.Kekilbaıuly kitaphanasy – eń baı kitaphanalardyń biri bolyp sanalady. Bul zal qorynda jazýshynyń kitaphana kollektsııasynan iriktelgen adamzat tarıhyna arnalǵan mádenıet jáne óner tarıhy týraly basylymdar, planetanyń uly tulǵalary týraly kitaptar, Qazaqstannyń aqyndary men jazýshylarynyń kitaptary, albomdar men atlastar, Qazaqstannyń geografııasy men tarıhy jáne onyń Shaǵyn Otany – Mańǵystaýdaǵy almanahtar men kóptegen qyzyqty basylymdar bar.
«Ábish álemi» zalynan bizdiń nazarymyzǵa «qalamger qoltańbasy» kitaby ilindi. Bul jınaqta Ábish Kekilbaıuly jeke kitaphanasynyń qoryndaǵy ádebıet álemine tanymal qalamgerlerdiń qoltańbalary toptastyrylǵan eken. Búgin sizderdiń nazarlaryńyzǵa aty ańyzǵa aınalǵan qazaqtyń kórnekti jazýshylarynyń Ábish Kekilbaıulyna arnap jazǵan qoltańbalaryn usynamyz.
«Ǵulama jazýshy, kórnekti memleket qaıratkeri Ábish Kekilbaev – aǵa – teńiz tereńindeı qurmetpen! Qasym-Jomart Toqaev. 24.11.07.»
«Ábish! Mendeı jazǵandy sendeı túsinip, Sendeı jazǵanda mendeı qýansa ǵoı jurtyń... Qadyr Myrza. 09.XII.73jyl.»
«Ábish – Qudaıǵa, Jumeken – paıǵambardan. Jumeken Nájimedenov. 15/VIII.67.»
«Janym Ábish,
Jigit boldyń eńseli,
Jylys qurar ordaly da keńseli.
Ómir baqı jaqsy kórip ótermin,
Júregimniń kúshi jetse men seni!
Nege? Ne úshin? Ony jaqsy bilesiń,
Bul ýaqytta mol ǵoı salǵan úlesiń.
Aqylymnyń aınasynda jyltyldap,
Júrer uzaq Ábish - degen bir esim!
Aǵań Ǵafý. 18.11.90».
«Allanyń nury jaýǵan, Júrek shamy jarqyrap janǵan, taǵdyrymnyń Temirqazyǵy – qadirli Ábekeme táýelsizdik taıfýny týraly romanymdy usynamyn! Dúkenbaı. Astana, 17 jeltoqsan 2005».
«Búgingi qazaq ádebıetiniń kemeńgeri Ábekeńe (Ábishke) «jazǵanyń kil klassıka bolsyn, oqıtynyń bizdiń kitap bolsyn» degen jalǵyz tilekpen. Maral. 24.III.1980J.
«Ábeke! «... Seni aıdahar jutýdy oılaǵanda, Bul qazaqty qyzǵyshtaı qorǵadyń-aý. Naızaǵaılar tóbeńde oınaǵanda, Jaıtartqyshyń, darıǵa, bolmadym-aý...» Avtor semıasynan. 6. XII.1979». M.Satybaldıev.
«Ábish!
Deı aldym ba birdeme, demedim be?!
Deı almasam, boǵymdy jegenim de.
Ókpe nazym, qaıǵy men qýanyshym,
Tursa bári jarady óleńimde...
M.Maqataev. 23.III.68 j.»
«Ábishke – Bizdiń qoldan keleri – osy ǵana. 20.01.1997» M. Maǵaýın.
«Qazaqtyń dara perzenti, ózim úlken darynyn, azamattyǵyn erekshe qadirleıtin Ábekeńe ózgeshe. 27.XII.96». M. Shahanov.
«Qurmetti Ábish, Klara! Ózderińe degen aǵanyń aq tileginiń belgisi bolsyn! Qudaıdyń buıyrǵan baqyty baıandy, densaýlyqtaryń jaqsy, tileýleriń árqashan qabyl bolýyna tilektes kóńilden. 15.09.2015». Serik Qırabaev.
«Ábishke!
Adam balasynyń basynda bolýy múmkin jaqsylyqtyń bárin ishteı tilep, ózińe «ursyp» júretin Farızadan. 1979, noıabr,23.» Farıza Ońǵarsynova.
«Bar jıǵan-tergenim áýeli Allaǵa, sodan soń ózińe amanat deıtin biregeıimniń biri Ábishjan! Sen buny saǵynar kúnderdiń belgisindeı sarǵaıyp jaratylǵan eken dep te saqtaǵaısyń. Al, búginderi bul qınalmaı qyzmet kórsetýińe tatysa ápende aǵańda arman qaısy?! Zor qurmetpen 14.03.1994» Hamıt Erǵalıev.
«Ábish baýyrym! Dúnıedegi eń asylyń anań ǵoı. Sol qasıetti anańnyń amandyǵyn tileımin! 30.08.97». Sherhan Murtaza.
«Qarshadaı kezimizden aǵalyq jolynan jazbaı, qara orman Qazaqtyń Sózi men Oıynyń júgin qara nardaı arqalap, arystar men alyptar jolyn jaǵalap kele jatqan ulttyń uly perzenti – Ábekeńe (Ábish Kekilbaıulyna)! Іnilik izetpen Nurlan Orazalın. 18.01.2014. Astana»
«Bilmeımin – qaıshylyq pa, kelisim be,
Áıteýir, dara bitken kóp ishinde.
Saqtaı gór osy adamdy, ýa, jaratqan,
Kerek ol men úshin de, el úshin de.
O, saqta qara nardaı sabyrymdy,
Mańdaıǵa sıyp turǵan daryndy uldy.
Ózińdeı Mańqystaýdyń mańǵazymdy,
Kózindeı burynǵynyń qadirlimdi,- dep tileıtin «jaman» inińizdiń kitaby bul.
Esenǵalı Raýshanov. 22.09.88j»
Osy qol jazbalardaǵy ystyq yqylastyń ózinen Ábish Kekilbaıulynyń áriptesteri arasynda úlkenge ini, kishige aǵa bola bilgen syıymdylyǵyn kórýge bolady. Qazaq jazýshylarynyń bir-birine degen jyly lebizderin kóre otyryp, ulylardyń bereke-birligi búgingi jastarǵa úlgi bolsa deımiz.