Ábish Kekilbaıuly majar halqynyń ótkenin qaıta jańǵyrtty – Ońaısha Mandokı
AQTAÝ. KAZINFORM – Aqtaýda Ábish Kekilbaıulynyń 85 jyldyǵyna arnalǵan halyqaralyq ǵylymı-tájirıbelik konferentsııada Majarstannan kelgen qazaq Ońaısha Mandokı sóz sóılep, zańǵar jazýshynyń shyǵarmashylyǵy jaıynda pikir bildirdi.
– Orys tilinen majar tiline aýdarylǵan qazaq jazýshylary shyǵarmalarynyń arasynda Ábishtiń «Báıgetory» povesiniń orny bólek. Óıtkeni ol kitapty oqyǵan majar halqy jazýshynyń shyǵarmasyn oqý arqyly ózderiniń umytyla bastaǵan, kóne salt-dástúrlerin kóz aldaryna elestete aldy. Ábish aǵanyń Eýropadaǵy qazaqtarǵa, sonyń ishinde qypshaq, majar halyqtaryna jasaǵan jaqsylyǵy – olardyń ótkenin qaıta jańartty, - dedi Ońaısha Mandokı.
Aıta keteıik, konferentsııa jazýshynyń qazaq rýhynyń asqaq kórinisi bola bilgen muralaryn álemdik deńgeıde nasıhattaý maqsatynda uıymdastyryldy. Atalmysh sharaǵa Ábish Kekilbaıulynyń úzeńgiles dostary, áriptesteri, otbasy músheleri, aqyn-jazýshylar men zııaly qaýym ókilderi, sondaı-aq Túrkııa, Majarstan, Ázerbaıjan, Qyrǵyz Respýblıkasy, Qaraqalpaqstan elderinen kelgen ǵalymdar qatysty.
Sondaı-aq mereıtoı aıasynda ІІІ halyqaralyq «Ábish álemi» teatr festıvali ótedi. Oǵan Iran, Mońǵolııa, Grýzııa, Reseı (Tatarstan), Qyrǵyz Respýblıkasynan, Astana men Almaty qalalarynan, Batys Qazaqstan, Aqmola oblysynan 8 teatr qatysyp jatyr. Festıvalge ulttyq teatr jáne kıno óneriniń abyzy, Qazaqstannyń Eńbek Eri Asanáli Áshimov bastaǵan elimiz ben shet elderdiń belgili akterleri men teatr qaıratkerlerinen, synshylarynan quralǵan qazylar quramy tórelik etedi. Sonymen qatar kórermenderge Ábish Kekilbaev shyǵarmalary jelisimen qoıylǵan qoıylymdarmen qatar jazýshynyń qazaq tiline aýdarǵan shetel klassıkteriniń dramalyq týyndylary jáne zamanaýı qoıylymdar usynylady.
Eske sala ketsek, buǵan deıin Ábish Kekilbaıulynyń 85 jyldyq mereıtoıyna arnalǵan halyqaralyq ǵylymı-tájirıbelik konferentsııada Májilis spıkeri Erlan Qoshanovtyń Prezıdent quttyqtaýyn jetkizgenin jazǵan edik.
