Ábish Kekilbaev týraly «Korıfeı» kitaby ázerbaıjan tilinde jaryq kórdi
ASTANA. KAZINFORM — Bakýdegi halyqaralyq kitap jármeńkesinde qazaqstandyq jazýshy, pýblıtsıst Saýytbek Ábdirahmanovtyń «Korıfeı» kitabynyń ázerbaıjan tilindegi nusqasy tanystyryldy, dep habarlaıdy Kazinform agenttiginiń Ázerbaıjandaǵy menshikti tilshisi.
Qazaqtyń kórnekti jazýshysy ári qoǵam qaıratkeri Ábish Kekilbaevtyń ómiri men shyǵarmashylyǵyna arnalǵan «Korıfeı» kitaby 21 qazanda XII Baký halyqaralyq kitap jármeńkesinde tanystyryldy. Kitaptyń ázerbaıjan tilindegi nusqasy Halyqaralyq túrki mádenıeti men murasy qorynyń qoldaýymen jaryq kórdi.
Jıynǵa Halyqaralyq túrki mádenıeti men murasy qorynyń prezıdenti Aqtoty Raıymqulova, Qazaqstannyń Ázerbaıjandaǵy elshisi Álim Baıel, Ázerbaıjan Ulttyq ǵylym akademııasynyń prezıdenti Isa Gabıbbeılı, Ázerbaıjandaǵy Atatúrik ortalyǵynyń dırektory Nızamı Djafarov, kitap avtory Saýytbek Ábdirahmanov jáne aýdarmashylar Hanym Aıdyn men Rabıǵa Nazymqyzy qatysty.
Aqtoty Raıymqulova «Korıfeı» kitabynyń Ábish Kekilbaevtyń ádebı ári rýhanı murasyn zerttep, keńinen nasıhattaýdaǵy mańyzyn atap ótti. Onyń aıtýynsha, shyǵarmanyń ázerbaıjan tiline aýdarylýy qazaq qalamgeriniń týyndylaryn keńirek tanytýǵa jáne túrki halyqtary arasyndaǵy mádenı baılanysty nyǵaıtýǵa jol ashady.
Saýytbek Ábdirahmanov kitaptyń jazylý tarıhyna, Ábish Kekilbaevtyń ómiri men shyǵarmashylyǵynyń negizgi kezeńderine, sondaı-aq qazaq ádebıeti men qoǵamdyq oıdyń damýyna qosqan úlesine toqtaldy. Al aýdarmashylar basylymdy ázerbaıjan tiline tárjimalaý barysynda jınaqtaǵan tájirıbesin bólisti.
Jıynǵa qatysýshylar Ábish Kekilbaevtyń shyǵarmashylyq murasy túrki halyqtarynyń ádebıetinde aıryqsha oryn alatynyn atap ótti.
Al halyqaralyq túrki mádenıeti men murasy qorynyń jańa basylymdaryn tanystyrý sharalary XII Baký halyqaralyq kitap jármeńkesinde 26 qazanǵa deıin jalǵasady.
Eske sala keteıik, buǵan deıin Astanada «Kekilbaev tulǵasy» kitabynyń tusaýkeseri ótkenin habarlaǵan edik.
