Abortqa tyıym salý máselesin qarastyryp jatqan joqpyz – mınıstr

NUR-SULTAN. QazAqparat – QR Densaýlyq saqtaý mınıstri Ajar Ǵınııat abort jasaýǵa tyıym salý týraly pikir bildirdi, dep habarlaıdy QazAqparat tilshisi.

«Batys elderde abort máselesi óte qyzý talqylanyp jatyr. AQSh-tyń birneshe shtatynda tipti tyıym da salyndy. Bul másele boıynsha siz ne oılaısyz», - dep surady BAQ ókili ortalyq kommýnıkatsııalar qyzmetinde ótip jatqan brıfıngide.

Mınıstr bul másele Qazaqstanda zańnama deńgeıinde retteletinin túsindirdi.

«Halyq densaýlyǵy jáne densaýlyq saqtaý júıesi týraly» kodeks boıynsha bizdiń elde áıelderdiń reprodýktıvtik quqyǵy bar. Demek, qursaǵyndaǵy balany dúnıege ákelý, ákelmeý máselesin ózi, otbasymen aqyldasyp sheshedi. Sondyqtan, elimizde abortqa tyıym salatyn normalar joq. Ázirge ondaı tyıym salatyndaı normalar engizý qarastyrylyp jatqan joq», - dedi vedomstvo basshysy.

Sondaı-aq, Ajar Ǵınııat koronavırýstyń qazirgi shtamy bastapqy shtamdaryndaı qaýipti emestigi týraly boljamdarǵa pikir bildirdi jáne ana men bala ólimin azaıtý úshin zamanaýı talaptarǵa saı perınataldyq ortalyqtar salynyp, eldegi búkil perzenthanalar kúrdeli jóndeýden ótetinin aıtty .

Foto: ortcom.kz