Abonentterdiń shyǵyndary 17 paıyzǵa únemdelmek
ASTANA. 22 qańtar. QazAqparat - Aǵymdaǵy jyldyń 1 qańtarynan bastap halyqaralyq końyraý shalýǵa tarıfıkatsııa birligi 1 sekýndqa deıin tómendedi.
Halyqaralyq qońyraý shalý birliginiń ólshemi 10 sekýndtan 1 sekýndqa deıin tómendeýi QR Kólik jáne kommýnıkatsııa mınıstriniń buıryǵyna sáıkes júzege asyrylǵan. Bul shara Qazaqstan Respýblıkasy baılanys qyzmetiniń barlyq tutynýshylaryna barlyq baǵyttar boıynsha sekýndty tarıfıkatsııaǵa tolyǵymen kóshýine múmkindik beredi. Abonentterdiń shyǵyndary 10-17 %-ǵa únemdeledi dep boljalanýda.
2012 jyldyń 1 shildesinen bastap QR Kólik jáne kommýnıkatsııa mınıstrliginiń bastamasymen qalalyq (aýyldyq) telefonnan halyqaralyq jáne uıaly baılanys operatorlarynyń abonentterine qońyraý shalý birliginiń ólshemi 10 sekýndtan 1 sekýndqa deıin tómendegenin eske salǵan jón. Qalalyq (aýyldyq) jáne uıaly telefonnan jaqyn jáne alys shet elderiniń «uıaly» baılanys operatorlarynyń abonentterine qońyraý shalý birligi 30 sekýndtan 10 sekýndqa deıin qysqartyldy.
«Esterińizge salsaq, tarıfıkatsııa birliginiń alǵashqy tómendeýi 2011 jyly QR Baılanys jáne aqparat mınıstrliginiń bastamasymen júzege asyrylǵan bolatyn. Ol kezde uıaly baılanys abonentteri úshin jeli ishinde jáne basqa jelige qońyraý shalý tarıfıkatsııasynyń birligi 1 sekýnd mólsherinde bekitildi. Sonymen birge, uıaly telefonnan basqa operatorlar abonentterine shalynǵan qońyraýdy qosý úshin bekitilgen tólemaqy alynyp tastaldy», - delingen QR KKM baspasóz qyzmetiniń málimetinde.
