Áblıazov tobynyń múshesi Chehııada qolǵa tústi
ASTANA. 30 qazan. QazAqparat - Qazaqstandyq BTA bankinen 5 mıllıard AQSh dollary kóleminde qarjy jymqyrdy degen kúdikke ilingen Tatıana Paraskevıch Chehııada ustaldy.
«Chehııada reseılik jáne ýkraınalyq polıtsııa izdestirgen áıel ustaldy...Jaqyn arada tergeý áreketterin júrgizý maqsatynda tergeýshiler sol elge barmaqshy» dep jazdy 29 qazan kúni Reseıdiń ishki ister mınıstrligine qarasty tergeý departamentiniń saıty.
Saıttaǵy aqparat boıynsha, kúdikti qýǵyndaǵy bıznesmen, BTA bankiniń burynǵy basshysy Muhtar Áblıazov basqarǵan "qylmystyq toptyń quramynda bolǵan". Paraskevıch qylmystyq top úshin aqsha jymqyrý shemasyn jasaý jáne qarjylandyrý isine jaýapty bolǵan dep sıpattalady.
«...Áblıazov pen onyń seriktesteriniń ústinen qylmystyq is qozǵalǵannan keıin Paraskevıch uzaq ýaqyt boıy Eýropa Odaǵy aýmaǵynda: Latvııa, Kıpr, Polsha, Chehııada quqyq qorǵaý organdarynan jasyrynyp júrgen» dep jazylǵan saıtta.
Reseı ishki ister mınıstrliginiń málimetine sáıkes, Paraskevıchtiń Máskeý jáne Altaı aýmaǵynda turǵan úılerine tintý júrgizilip, tergeýshiler «kóptegen kommertsııalyq uıymdar men salyq organdarynyń jalǵan mórlerin tapqan».
Buǵan deıin Máskeýdegi Dorogomılovskıı soty BTA bankinen 730 mıllıon dollar qarjy jymqyrdy dep aıyptalǵan «Eýrazııa Logıstık» kompanııasynyń tórt joǵary laýazymdy qyzmetkerin segiz-toǵyz jyl merzimge sottaǵan edi, dep habarlaıdy «Azattyq».
