Ábilmansur Syrmanov IX Beıjiń balet baıqaýynda jeńiske jetti

ASTANA. KAZINFORM – 21–27 qazan aralyǵynda Qytaıda Bı biliminiń dúnıejúzilik alıansy (World Dance Education Alliance) aıasynda IX Beıjiń balet baıqaýy jáne Beıjiń bı akademııasynyń forýmy ótti. Bul týraly Mádenıet jáne aqparat mınıstrliginiń baspasóz qyzmeti habarlady.

Baıqaýda Qazaqstannyń namysyn Qazaq ulttyq horeografııa akademııasynyń stýdenti Ábilmansur Syrmanov qorǵady. Fınalda ol A. Adannyń «Jızel» baletindegi Alberttiń varıatsııasyn jáne zamanaýı bı nómirin oryndap, altyn medal ıegeri atandy.

Baıqaý qazylar alqasynyń quramynda álemge áıgili balet óneriniń maıtalmandary – Nına Ananıashvılı, Vladımır Malahov, Sın Lılı, Erık Gılere jáne basqalary boldy. Al baıqaýdyń keńesshisi retinde Sıao Sýhýa, Djao Rýheng, Fen Ing jáne ózge de tanymal tulǵalar shaqyryldy.

Akademııanyń kórkemdik jetekshisi Altynaı Asylmuratova bul jeńis Qazaqstannyń álemdik balet sahnasyndaǵy bedelin arttyra túsetin mańyzdy jetistik ekenin atap ótti.

Bıylǵy konkýrsqa 10 elden kelgen 57 oryndaýshy qatysyp, álemniń jetekshi balet mektepterin tanystyrdy.

Stýdentterdiń Qytaıǵa sapary Qazaqstan Respýblıkasynyń Mádenıet jáne aqparat mınıstrliginiń, CNPC jáne PetroKazakhstan kompanııalarynyń qoldaýymen, sondaı-aq Qazaqstannyń Qytaıdaǵy Elshiliginiń yqpaldastyǵymen uıymdastyryldy.

Buǵan deıin qazaqstandyq stýdentter Qytaıda baq synaıtynyn jazǵan edik.