Ábilqaıyr Sqaqov ÁMSQ basqarma tóraǵasy qyzmetine taǵaıyndaldy

Ábilqaıyr Sqaqov Áleýmettik medıtsınalyq saqtandyrý qory basqarma tóraǵasy qyzmetine taǵaıyndaldy, dep habarlaıdy QazAqparat.

Áleýmettik medıtsınalyq saqtandyrý qorynyń ujymyna jańa basshyny QR Densaýlyq saqtaý birinshi vıtse-mınıstri Tımýr Sultanǵazıev tanystyrdy.

«Ábilqaıyr Baqtybaıulynyń memlekettik qyzmette 28 jyldan astam tájirıbesi bar, onyń 18 jylyn birinshi basshy retinde qyzmet atqarǵan. Qarjy mınıstrliginiń júıesinde 19 jyl jumys istedi. Sonyń ishinde Salyq komıteti tóraǵasynyń orynbasary jáne Qarjy monıtorıngi komıtetiniń tóraǵasy qyzmetin atqardy», - dep atap ótti birinshi vıtse-mınıstr.

Ábilqaıyr Sqaqov 1974 jyly Pavlodar oblysynda dúnıege kelgen. «Ekonomıst jáne qarjyger» (Shákárim atyndaǵy Semeı memlekettik ýnıversıteti), «Zańger» (Qazaq quqyq jáne halyqaralyq qatynastar ınstıtýty) jáne «Іskerlik ákimshilendirý magıstri» (M.Lomonosov atyndaǵy Máskeý memlekettik ýnıversıteti) mamandyqtary boıynsha úsh joǵary bilimi bar.

Ábilqaıyr Sqaqov 1995 jyldan 2012 jylǵa deıin Pavlodar jáne Qostanaı oblystarynyń salyq organdarynda jumys istedi. 2006–2008 jyldar aralyǵynda Pavlodar oblysy densaýlyq saqtaý departamenti dırektorynyń ekonomıka jónindegi orynbasary qyzmetin atqardy.

2012-2016 jyldary Qarjy mınıstrligi júıesinde, onyń ishinde Astana qalasy boıynsha Memlekettik kirister departamentin basqardy. 2016-2019 jyldar aralyǵynda Ábilqaıyr Sqaqov Qorǵanys mınıstriniń orynbasary retinde qarjy jáne ekonomıka máselelerin basqardy, odan keıin Qarjy monıtorıngi komıtetiniń tóraǵasy. 2020-2022 jyldary Pavlodar oblysynyń ákimi boldy.

«Ereń eńbegi úshin» medalimen marapattalǵan jáne «Qurmet» ordeniniń ıegeri.