Ábilqasymova alaqan arqyly tólem jasaý júıesi týrasynda: qaýipsizdik basty nazarda bolýy tıis

ASTANA. KAZINFORM — Qarjy naryǵyn retteý jáne damytý agenttiginiń tóraǵasy Mádına Ábilqasymova bankterdiń adamnyń alaqany arqyly tólem jasaý júıesin engizýine qatysty pikir aıtty. 

— Eldegi bankterdiń barlyǵy qarjylyq tehnologııalar qyzmetterinde ózara básekege túsip jatyr, ıaǵnı barynsha kóp klıent tartýǵa tyrysady. Jalpy, jańa qarjylyq ónimder men tehnologııalardy engizý óte qarqyndy júrip jatyr. Búgin Májiliste bankter týraly zań jobasyn talqylaý kezinde depýtattar bıometrııa máselesin kóterdi. Shyn máninde, problemalar áli de bar, bıometrııa boıynsha etalon bazasy joq. Ol qaýipsizdikti qamtamasyz etý úshin jasalýy kerek, — dedi Mádına Ábilqasymova. Parlament Májilisinde tilshiler suraǵyna jaýap bere otyryp.

Osy oraıda ol jańadan engiziletin qarjy salasyndaǵy tehnologııalar qaýipsizdik turǵysynda tyńǵylyqty tekserýden, baǵalaýdan ótýi kerek ekenin aıtty.

— Sondyqtan zańnama aıasynda bankterge qatysty qoıylǵan aqparattyq qaýipsizdiktiń jalpy tártibi bar. Munymen qosa, jańa qarjylyq ónimdi ázirleý jáne qyzmet kórsetý kezinde talaptardy oryndaý qaǵıdasy jazylǵan qaýly bar. Eger qandaı da bir zań buzý derekterin anyqtasaq, onda mundaı ónimge nemese qyzmet túrine tyıym salamyz, — dedi agenttik basshysy.

Budan buryn habarlanǵandaı, Qarjy vıtse-mınıstri Áset Turysov Qazaqstandaǵy adamnyń alaqany arqyly tólem jasaý júıesine qatysty pikir aıtqan edi.