Ábilhan Qasteev atyndaǵy óner mýzeıi jóndeýden keıin qaıta ashylady
ASTANA. KAZINFORM — Ábilhan Qasteev atyndaǵy Qazaqstan Respýblıkasynyń Ulttyq óner mýzeıi aýqymdy jańǵyrtý jumystarynan keıin óz jumysyn qaıta bastaıdy. Búgin mýzeıge Qazaqstan Respýblıkasy Premer-mınıstriniń orynbasary – Mádenıet jáne aqparat mınıstri Aıda Balaeva bardy.
Memleket basshysynyń qoldaýymen qysqa merzimde júrgizilgen keshendi jańǵyrtý jumystary óner týyndylaryn saqtaý jáne ekspozıtsııalaý úshin zamanaýı jaǵdaı jasaýǵa baǵyttaldy. Aıda Balaeva jóndeý jumystarynyń nátıjelerimen tanysty.
Mýzeıdiń ishki bólmeleri men shatyry jańartylyp, eden jabyndary aýystyryldy, sondaı-aq ınjenerlik júıeler jańǵyrtylyp, klımattyq baqylaý júıesi ornatyldy. Nátıjesinde eldegi basty kórkem galereıa zamanaýı halyqaralyq standarttarǵa saı, halyqaralyq deńgeıdegi kórme jobalaryn iske asyrýǵa tolyq daıyn. Jóndeý jumystarymen qatar mýzeı mamandary ekspozıtsııalardy da jańartty.
Kórermenge burynnan tanys qazaqstandyq jáne álemdik óner jaýharlarymen birge jańa bólimder usynyldy. Atap aıtsaq, grafık-sýretshi Evgenıı Sıdorkınniń shyǵarmalar kórmesi, «Qazaq ónerindegi áıel beınesi» ekspozıtsııasy, Qazaqstannyń táýelsizdik kezeńindegi óner bólimi, sondaı-aq HH ǵasyrdyń sońy – HHІ ǵasyrdyń basyndaǵy sheteldik ónerdiń jańa týyndylaryna arnalǵan bólim bar.
Aıta ketsek, óner ordasynyń qaıta ashylýy mýzeıdiń 90 jyldyǵy men 1976 jyldan beri ornalasqan ǵımarattyń 50 jyldyǵymen tuspa-tus kelip otyr. Jańǵyrtý jobasy Qazaqstan Respýblıkasy Mádenıet jáne aqparat mınıstrliginiń qoldaýymen júzege asty. Jóndeý jumystary memlekettik organdardyń, mýzeı ujymynyń jáne seriktesterdiń, sonyń ishinde «Samuryq-Qazyna» ulttyq ál-aýqat qory men «Senim Qogamy» qoǵamdyq qorynyń ózara yntymaqtastyǵynyń arqasynda jasaldy.
Buǵan deıin Aıda Balaeva Qazaq ulttyq drama teatryn 100 jyldyq mereıtoıymen quttyqtaǵan bolatyn.