Abyz rýhyna taǵzym – Mańǵystaý ákimi Ábish Kekilbaev alleıasynda senbilik jasady
ASTANA. KAZINFORM – Mańǵystaý oblysynyń ákimi Nurdáýlet Qılybaı elordaǵa saparynda Ábish Kekilbaev saıabaǵynda senbilik jasady.
Qarymdy qalamger, kórnekti memleket jáne qoǵam qaıratkeri, Eńbek Eri, Qazaqstannyń halyq jazýshysy Ábish Kekilbaev atyndaǵy alleıa 2018 jyldyń mamyr aıynda «Astana Opera» teatryna qarama-qarsy ýchaskede ashylǵan.
Bul aýmaqta qaraǵaı, sibir shyrshasy, qyzyl sheten, usaq japyraqty shegirshin sııaqty 250-ge jýyq aǵash otyrǵyzylǵan. Tipti abyz jazýshynyń ózi kózi tirisinde osy mańaıǵa aǵash otyrǵyzǵan kórinedi.
– Ábish Kekilbaıuly – san qyrly talant ıesi. Qazaq ádebıeti men mádenıetine úlken olja salyp, ólsheýsiz eńbek etti. Oǵan qosa, saıasat salasynda da eleýli eńbek sińirgen qaıratker, Mańǵystaýda týyp-ósken Túrkiáleminiń tulǵasy. Keshe Mańǵystaýdan Astanadaǵy ınvestıtsııalyq forýmǵa kelgenbiz. Osydan birneshe aı buryn mańǵystaýlyq aqsaqal Astanada Ábish Kekilbaev alleıasy baryn eske salyp, qaraýsyz qaldyrmańdar dep eskertken edi. Bastama sodan týyndady. Qoǵamdyq jumysqa mańǵystaýlyq jastardy da shaqyrdyq. Ábish atamyzdyń murasyn bilip júrsin, ári eńbekke aralassyn degen oıdy maqsat ettik. Bul jumystar keleshekte de jalǵasyn tabady, – dedi Mańǵystaý oblysynyń ákimi tilshilerge bergen suhbatynda.
Keshe Astanada ótken KGIR-2025 jahandyq ınvestıtsııalar dóńgelek ústelinde Mańǵystaý oblysy kanadalyq ınvestorlarmen eki joba boıynsha kelisim ornatqan. Olar – metanol shyǵaratyn zaýyt qurylysy jáne tabıǵı gaz óndirý zaýyty. Tereń óńdeý baǵytyndaǵy bul jobalardyń jalpy quny 200 mıllıon dollarǵa jýyqtaıdy.
Kún raıynyń sýyqtyǵyna qaramastan, senbilikke belsendi jastar da keldi. Olardyń arasynda jumysshy mamandyǵynda oqyp júrgen stýdentter de bar.
– Men Eýrazııa ulttyq ýnıversıtetinde «Elektr energetıkasy» kafedrasynda oqımyn. Mamandyǵymdy ózim qalap tańdadym, eńbek adamdarynyń qashanda suranysta bolatynyn, qurmetke bólenetinin túsinemin. Ábish atamyzdyń ónegeli ómiri – bárimizge úlgi. Árbir qazaqtyń jigiti elin aıalap, topyraǵyn qasterlep, qoǵamdyq jumystarǵa qatysyp turýy kerek, – deıdi stýdent Salamat Ibragımov.
Sondaı-aq ákim 13 qazan men 26 qarasha aralyǵynda ózi basqaratyn óńirde «Taza Mańǵystaý» 45 kúndik chellendji bastalǵanyn eske saldy. Naýqannyń negizgi maqsaty – ekologııalyq mádenıetti qalyptastyrý jáne aımaqtaǵy ekobelsendiler men eriktiler qozǵalysyn qoldaý.
Qazirgi ýaqytta chellendjge 33 ujym, 43 qatysýshy atsalysyp keledi. Olar ár kúni ózderiniń ekologııalyq isterin jarııalap, nátıjelerin arnaıy onlaın kúntizbede belgileıdi. Jeńimpazdar chellendj sońynda arnaıy komıssııa sheshimimen anyqtalady. Jalpy júlde qory – 7 mln teńge. Onyń ishinde jeke qatysýshylarǵa 2 mln teńge, ujymdyq qatysýshylarǵa 5 mln teńge kóleminde syıaqylar qarastyrylǵan.
Bastama aıasynda eko-vıktorınalar, onlaın-kvızder ótedi. Ekologııa taqyrybyndaǵy ádebıettermen tanystyrýǵa arnalǵan «Jasyl kitaphana» jobasy jáne «Biz Taza Qazaqstandy qoldaımyz» atty 200-den asa stıkerler taratylyp, dárister oqylady.
Memleket basshysy Qasym-Jomart Toqaevtyń tapsyrmasymen bastalǵan «Taza Qazaqstan» jalpyulttyq ekologııalyq naýqany da Mańǵystaýda tabysty qorytyndylandy. Jyl basynan beri aktsııaǵa 122 myńnan astam adam qatysqan, 30 757 túp aǵash otyrǵyzylǵan. 1735 tehnıka jumyldyrylyp, 35 myń tonna qoqys shyǵarylǵan.
Týrıstik oryndar men halyq tyǵyz ornalasqan aýmaqtarǵa 30-ǵa jýyq arnaıy konteıner qoıylyp, qaldyqtardy azaıtý boıynsha úzdiksiz jumystar qolǵa alyndy. Teńiz jaǵalaýlaryn taza ustaý maqsatynda 45 jer paıdalanýshy mekemelermen arnaıy keste bekitildi.
Mańǵystaý oblysy boıynsha «Tazaqazaqstan.kz» platformasyna turǵyndardan 635 ótinish túsken. Onyń 532-si oryndaldy, 13-i oryndalyp jatyr.
Eske sala ketsek, Jibek Joly telearnasyndaǵy «Taza qala» baǵdarlamasy Mańǵystaý oblysyndaǵy Jańaózen qalasynyń tazalyǵy men estetıkasy jóninde baǵdarlama túsirgen edi.
