Ábishti Uly bılerdiń dástúrin boıyna berik sińirgen adam dep qaraıtyn edik - S. Qırabaev
ASTANA. QazAqparat - Ábish barsha kúsh-jigerin Táýelsizdikti túsindirýge, ornyqtyrýǵa jumsady. Búgin Astanadaǵy «Kórme» kesheninde Ábish Kekilbaıulyn aqtyq saparǵa shyǵaryp salý qaraly jıynynda kórnekti ǵalym, akademık Serik Qırabaev osylaı aıtty.
«Ábishtiń kim ekenin qazaq halqy jaqsy biledi. Óziniń alyp talantymen, qoǵamdyq jáne memlekettik qyzmetimen Táýelsizdik jyldarynda Ábish halqyna adal qyzmet etti. Barlyq jazýshylyǵyn da, talantyn da osy Táýelsizdikti túsindirýge, ornyqtyrýǵa jumsady. Sonymen birge ol sózge sheshen, tapqyr, alǵyr, óte epti tulǵa edi. Sondyqtan ony Uly bılerdiń dástúrin boıyna berik sińirgen adam dep qaraıtyn edik»,-dedi akademık.
Sonymen qatar S. Qırabaev óz sózinde Ábish Kekilbaıulymen sońǵy kezdesýi jaıynda aıtyp berdi.
«Osydan eki aı buryn ekeýmiz kezdesken edik. Eshkim bizge bóget bolǵan joq. Sol kezde ekeýmiz syrlasyp, sherimizdi bir tarqatyp qaıtyp edik. Qosh Ábish! Jany jánnatta bolsyn!»,-dep tebirendi ǵalym.
