Ábish Kekilbaıulynyń kez kelgen shyǵarmasynyń arǵy jaǵynda bir tarıhtyń elesi turady - B. Nurjekeuly
ALMATY. QazAqparat - Ábish Kekilbaıulynyń kez kelgen shyǵarmasyn oqyńyzshy, arǵy jaǵynda bir tarıhtyń elesi turady.
Qazaqstannyń halyq jazýshysy, memleket jáne qoǵam qaıratkeri, Qazaqstan Respýblıkasynyń alǵashqy Memlekettik hatshysy Ábish Kekilbaıulynyń qazasyna baılanysty belgili jazýshy, Halyqaralyq Alash syılyǵynyń laýreaty Beksultan Nurjekeuly osylaı dedi.
Onyń aıtýynsha, Ábish Kekilbaıulynyń barlyq shyǵarmalary fılosofııalyq, kórkemdik, maǵynalyq, tereńdik jáne astarlap aıtý jaǵynan jumyr qurylǵan dúnıeler.
«Týmaq bar da ólmek bar. Biraq, úlken azamatymyzdan aırylyp, qabyrǵamyz qaıysyp otyr. Ábekeńniń esimi, onyń barlyǵynyń ózi ádebıetimizde ádildiktiń, adaldyqtyń bar ekendigin meńzep, dáleldep turýshy edi. Ábekeń myna tarıh pen ómirdi teń biletin. Tarıhsyz shyǵarmasy joq deýge bolady. Tarıh salasyn óte kóp zerttegen. Óte kóp oqyǵan. Tipti, men kezinde baspada istegenmin, kitap suratyp alyp oqıtyn. Odan arlanbaıtyn. Onyń naǵyz qazyna ekenin jaqsy biletin. Ábekeńniń kez kelgen shyǵarmasyn oqyńyzshy, arǵy jaǵynda bir tarıhtyń elesi turady. Tarıhty tereń biletindigi kórinip turady. Al tarıhy taıaz shyǵarmanyń ózi tereń tamyrly da bolmaıdy ǵoı. Mine, Ábish Kekilbaıulynyń basqa jazýshylardan ereksheliginiń ózi osynda edi. Myqtylyǵy da sonda bolatyn», - dedi B. Nurjekeuly.
