Ábish Kekilbaıuly - qazaq ádebıetindegi tutas bir dáýir - Q. Ergóbek
ALMATY. QazAqparat- Ábish Kekilbaıuly - qazaq ádebıetindegi tutas bir dáýir. Búgin Qazaqstannyń halyq jazýshysy, memleket jáne qoǵam qaıratkeri. Qazaqstan Respýblıkasynyń alǵashqy Memlekettik hatshysy Ábish Kekilbaıulynyń qazasyna baılanysty belgili ádebıet zertteýshisi, synshy, fılosofııa ǵylymdarynyń doktory, professor Qulbek Ergóbek osyndaı pikir bildirdi.
Onyń aıtýynsha, bolashaq ádebıetsúıer urpaq Ábish Kekilbaıuly ómir súrgen, shyǵarmalaryn jazǵan dáýirdi Ábish Kekilbaıulynyń dáýiri dep ataýy múmkin. «Dúıeden Ábish aǵa ótti. Telegeı-teńiz oı óldi. Úlken kisilik ketti. Ábish Kekilbaıuly qazaq qalamgerliginiń bir etalony edi. Ol qazaq ádebıetindegi tutas bir dáýir. Ábish Kekilbaı aǵamyz qazaq ádebıetin, baıandaýdan fılosofııalyq tolǵaýǵa aınaldyrǵan, syrt baıandaýdan keıipkerdiń ishki jan-dúnıesine túsken, keıipkerleriniń tabıǵatyna alty alashtyń, qazaq ultynyń qarapaıym azamatynyń da hanynyń da tarıhyn syıǵyza jyrlaǵan uly sýretker edi. Ábekeń ómir súrgen, Ábekeń shyǵarma jazǵan dáýirdi keleshek urpaq, keleshek ádebıetsúıer qaýym Ábish Kekilbaı dáýiri dep ataýy da múmkin», - dedi Q. Ergóbek.
