Ábish Kekilbaıuly Astanadaǵy Ulttyq panteonǵa jerlendi
ASTANA. QazAqparat - Kemeńger tulǵa, iri qoǵam qaıratkeri, asa daryndy jazýshy, QR Eńbek Eri, Qazaq ádebıetiniń Abyzy Ábish Kekilbaıuly Astanadaǵy Ulttyq panteonǵa jerlendi.
Buryn habarlanǵandaı, Ábish Kekilbaıulyn aqtyq saparǵa shyǵaryp salý rásimi búgin Astanadaǵy «Kórme» kesheninde ótken bolatyn.
«Qurmetti qaýym! Jaqyn týystary men qalyń jurtshylyqtyń kelisimimen, Elbasy sheshimimen Qazaqstannyń halyq jazýshysy, Eńbek Eri Kekilbaev Ábish Kekilbaıulynyń súıegi Astana qalasyndaǵy Ulttyq panteonda jerlenetinin habarlaımyn. Uly jazýshy, qazaq halqynyń jarqyn perzenti Ábish Kekilbaıulynyń rýhy elimen máńgi jasaıdy»,-dedi búgin Senat Tóraǵasy Qasym-Jomart Toqaev kemeńger tulǵa Ábish Kekilbaıulyn aqtyq saparǵa shyǵaryp salý qaraly jıynynda.
Ulttyq panteon - Qazaqstannyń belgili qoǵam jáne memlekettik qaıratkerlerine arnalǵan zırat. 2013 jyldyń qazanynda QR Prezıdenti Nursultan Nazarbaevtyń sheshimimen Ulttyq panteonǵa alǵashqy bolyp belgili saıası qaıratker Oral Muhamedjanov jerlengen bolatyn. Al 2014 jyldyń qańtarynda halyq aqyny, qoǵam jáne memleket qaıratkeri, Memlekettik syılyqtyń laýreaty Farıza Ońǵarsynova, bıylǵy qazanda zań ǵylymdarynyń doktory, professor, kórnekti qoǵam jáne memleket qaıratkeri Maqsut Sultanuly Nárikbaev Panteonǵa jerlendi.
