Ábish Kekilbaıuly ádebıetke qubylys bolyp keldi - N. Orazalın
ASTANA. QazAqparat - Ábish Kekilbaıuly ulylarǵa tán ǵumyr keshti. Búgin Astanadaǵy «Kórme» kesheninde Ábish Kekilbaıulyn aqtyq saparǵa shyǵaryp salý qaraly jıynynda Parlament Senatynyń depýtaty, Qazaqstan Jazýshylar odaǵynyń tóraǵasy Nurlan Orazalın osylaı málim etti.
«Mine úsh kún boldy, Qazaqstan jurtshylyǵy biriniń kóziniń jasyn biri súrtip, alys-jaqynnan kelgen aǵaıyn jurt, tanys jáne beıtanys el birine-biri kóńil aıtyp, sabyrǵa shaqyrýda. Halqymyzdyń mańdaıyna bitken ulylaryn, birtýarlaryn bizdiń tamyryn tereńnen tartar uly jurtymyz qalaı alaqanyna salyp, qalaı qadirlep, sońǵy saparǵa da qalaı shyǵaryp salatyndyǵynyń talaı kýási bolyp kele jatyrmyz. Búgin qaıǵymyzdy jeńildetip, kózimizdiń jasyn súrtip, Ábekeńniń otbasyna kóńil aıtyp otyrmyz»,-dedi Nurlan Orazalın.
Osy oraıda ol óz sózinde 1960-shy jyldary Ábish Kekilbaıuly ádebıetke qubylys bolyp kelgenin, bıikten jyǵylmaı, ishki tazalyǵyn saqtap ómirden ótkenin atap ótti.
«Ulylarǵa tán ǵumyr keshti. Qazaqta, ásirese kórkem ádebıette «dáýir» deıtin sózdi jıi eske alamyz. «Abaıdyń dáýiri», «Mahambettiń dáýiri», «Jambyldyń dáýiri» deımiz. Mine keshegi «Áýezovtiń dáýiri» dep aıtýshy edik. Endi Ábish Kekilbaevtyń dáýiri ulttyń úlken uly arenasyna shyǵyp otyr. Qalyń eliniń ádebıetin uly bıikke, álemdik deńgeıge, jańa satyǵa kóterdi. Elbasymyzdyń qasynda júrip, halqy úshin janyn pıda etýge de daıyn ekenin baıqatyp edi. Sol bizge úlgi ári mektep»,-dep tebirendi N. Orazalın.
Sonymen qatar depýtat óz sózinde Ábish Kekilbaıulynyń ómirden ótýine baılanysty Qazaqstan Jazýshylar odaǵynyń atyna jan-jaqtan kóńil aıtý jedelhattary kelip jatqanyn jetkizdi. Kóptegen elderdiń jazýshylarynan kelgen osy jedelhattar otbasyna tapsyrylatyn bolady.
