Ábish Kekilbaıuly adamzattyń aqyl-oı qazynasyn kókirek kózinen ótkizgen abyz tulǵa - akademık Ó.Aıtbaıuly

ASTANA. QazAqparat - Qazaq halqy taǵy bir aıaýly ulynan, alyp tulǵasynan aıryldy. Elim dep soqqan taǵy bir úlken júrek soǵýyn toqtatty. Mynaý jaryq dúnıeden aıadaı ǵana aýyldan shyǵyp, alty Alashtyń ardaqtysyna aınalǵan, adamzattyń aqyl-oı qoryna asyl týyndylaryn qosyp, kórkem oıdyń kókjıegin keńeıtken Ábish Kekilbaev ótti, deıdi «Qazaq tili» halyqaralyq qoǵamynyń prezıdenti, akademık Ómirzaq Aıtbaıuly Qazaqstannyń halyq jazýshysy, memleket jáne qoǵam qaıratkeri, Qazaqstan Respýblıkasynyń alǵashqy Memlekettik hatshysy Ábish Kekilbaıulynyń qazasyna baılanysty.

Ǵalymnyń aıtýynsha, Ábekeń ultymyzǵa es, syrtymyzǵa ses edi. Elimiz Ábekeń sııaqty alyptarymen eńseli edi, Ábekeńdeı asyl azamattarymen arly edi. Ábekeńdeı jumyr jerdi júregine syıdyryp, adamzattyń aqyl-oı qazynasyn kókirek kózinen ótkizgen abyz tulǵalarymen parasatty edi. Osyndaı aıaýly tulǵasynan aırylý qara orman halqymyzdyń arqasyna aıazdaı batyp tur.

«Desek te, qazaqtyń altyn qursaqty analary Ábekeńdeı asyl uldardy dúnıege ákelmeı turmas-aý. Alaıda, Ábekeńniń orny árqashanda bólek, árqashanda dara, erekshe bilinip turmaq. Qalyń qazaq aqyl-oıǵa sýsaǵanda, tereńdik izdep sabylǵanda, tyǵyryqqa tirelip, daǵdarǵanda, bıiktik kóksep, kókke umtylǵanda, tańǵy shyqtaı taza, daladaı keń tynys ańsaǵanda Ábekeńniń artynda qalǵan telegeı-teńiz murasy kitaptaryna - «Eleń alańyna», «Úrkerine», «Shyńyraýyna», «Kúıshisine», «Hansha darııa hıkaıasyna» qaıta-qaıta aınalyp soqpaq. Ózekti órteıtin ókinish, qabyrǵa qaıystyrar aýyr qaza...», - deıdi akademık Ómirzaq Aıtbaıuly.

«Qara ormandaı qalyń jurtymyzǵa, Ábekeńniń otbasyna, týǵan-týystaryna qaıǵylaryna ortaqtasyp kóńil aıtamyz. Ábekeńniń aldy - peıish, arty - kenish bolsyn. Jatqan jeri jaıly, topyraǵy torqa bolsyn», - dep túıindedi ol.