Ábish Kekilbaevtyń týǵan aýylynda eskertkishi qoıyldy

AQTAÝ. QazAqparat - Halyq jazýshysy, memleket jáne qoǵam qaıratkeri Ábish Kekilbaevtyń týǵan kúni qarsańynda týyp-ósken aýyly Ondyda eńseli eskertkish boı kóterdi, dep habarlaıdy QazAqparat tilshisi.

Ádebıettiń alyby, kemeńger tulǵanyń keń keýdesi men kelisti kelbetin beınelegen eskertkish ózi bilim alǵan orta mekteptiń aýlasynda ornalasqan.

Abyzdyń eskertkishi Almaty qalasynda daıyndalǵan. Arnaıy qashalyp jasalǵan músin tuǵyrynyń bıiktigi 1.70 m. Eni - 1 metr. Qalyńdyǵy - 70 sm. Bıiktigi - 1.40 metrdi quraıdy.

Igi sharaǵa oblys ákimi Serikbaı Trumov, óńirdiń aqsaqaldary, jazýshynyń týystary men úzeńgiles dostary qatysty.

Ashylý saltanatynda sóz alǵan aımaq basshysy Ábish Kekilbaıulynyń 80 jyldyǵyna arnalǵan is-shara jyl sońyna deıin jalǵasatynyn aıtty.

Aıta keteıik, elordamyz Nur-Sultan qalasynda da Ábish Kekilbaıulynyń týǵan kúnine oraı birneshe shara uıymdastyrylýda.