Ábish Kekilbaev jaıdary minezdi, bólek bolmysty, tekti qalamgeri edi - Ǵ. Jaılybaı
ALMATY. QazAqparat - Ábish Kekilbaev syndy qazaqtyń mıýaly báıtereginiń qulaýy orny tolmas qaza. Bul týraly oıyn aqyn, Qazaqstan Jazýshylar odaǵy basqarmasy tóraǵasynyń birinshi orynbasary, Halyqaralyq «Alash» ádebı syılyǵynyń laýreaty Ǵalym Jaılybaı aıtty.
«Ábish Kekilbaev qazaq jurtynyń kóz aldynda ósip, óngen jazýshy. 1962 jyly alǵashqy óleńder jınaǵy shyqty. Ol asa úlken halyq jazýshysy. Tarıh tamyrlaryna tereń boılap, úlken shyǵarmalar jazdy. Ádebı synmen, aýdarmamen aınalysty. Ábekeńniń aınalyspaǵan janry joq. Máýeli báıterek sııaqty qazaq jurtynyń kóz aldynda ósip-óndi. Halyq jazýshysy ǵana emes, Eńbek Eri ataǵyn aldy. Ol ekiniń birine buıyrmaǵan ataq. Ábekeń memleket, qoǵam qaıratkeri dárejesine deıin ósti. Asa jaıdary minezdiń, bólek bolmystyń, tekti qalamgeri edi. Búgin barsha Alash jurtynyń qabyrǵasy qaıysyp otyr. Ábekeńniń qazasy ózinen keıingi mańdaıyn sıpaǵan inileriniń qaı-qaısysyna da úlken qaza dep esepteımin. Ol kisiniń qalamgerlik qyrlary, ónegeli ómiri urpaqtan-urpaqqa jetetin úlken mura dep esepteımin», - dedi Ǵ.Jaılybaı.
