Ábish Kekilbaev ádebıet esigin ımenbeı ashyp, birden tórine shyqqan tulǵa - M. Joldasbekov
ASTANA. QazAqparat - Ábish Kekilbaev týǵan halqymen birge jasaı beretinine eshqandaı kúmándanbaımyz. Búgin Astanadaǵy «Kórme» kesheninde Ábish Kekilbaıulyn aqtyq saparǵa shyǵaryp salý qaraly jıynynda kórnekti memleket jáne qoǵam qaıratkeri, professor Myrzataı Joldasbekov osylaı málim etti.
«Biz búgin halqymyzdyń zańǵar jazýshysyn, elimizdiń kórnekti memleket qaıratkerin qazaqtyń Ábishin, Abyzyn sońǵy saparǵa shyǵaryp salyp turmyz. Ábish Kekilbaev ádebıet esigin ımenbeı ashyp, birden sonyń tórine shyqqan, ónerde óziniń jolyn tapqan, tarıh bolmysyn, darhan dalanyń ulylyǵyn jarqyratyp ashqan, sóıtip qazaq ádebıetiniń kósegesin kógertken, kórkem shejire jasaı bilgen epık jazýshy edi. Azamattyq tulǵasy, qaıratkerlik kelbeti, sýretkerlik bolmysy, gýmanıstik tabıǵaty, adamı bitimi bólek óz eliniń súıikti perzenti edi»,-dep eske aldy M. Joldasbekov.
Sonymen qatar ǵalym óz sózinde Ábish Kekilbaev óz jerinde baqytyn tapqan azamat, maqtaýǵa jáne qolpashtaýǵa laıyqty azamat dep atap ótti.
«Ábish ushan-teńiz, bilimpaz jáne dana edi. Altyn qursaq analar aman bolsa, áli de talaı Ábishter keler dúnıege, biraq olardyń eshqaısysy Kekilbaev bola almaıdy. Ábishti halqy laıyqtap baǵalady, Eńbek Eri atandy, alqaly jıyndardyń únemi tórinde otyrdy. Artynda baı mura, ataly sóz, asyl ónege qaldy. Sondyqtan onyń týǵan halqymen birge jasaı beretinine eshqandaı kúmándanbaımyz»,-dep tebirendi M. Joldasbekov.
