Ábish geolog bolýdy armandaǵan - jazýshynyń zaıyby Klara

Sol jerde jazýshynyń jubaıy Klara Jumabaeva Ábishtiń geolog bolýdy armandaǵany týraly bir jyly estelikpen bólisti, dep xabarlaıdy QazAqparat tilshisi.

"Ábish mektepke barmaı turyp, dalada ushyp bara jatqan gazetti qýyp júrip, oqýdy tanyǵan. Sonda jatyp alyp, qazaqsha-oryssha kitap oqıdy. Birde tórtinshi synypta oqyp júrgeninde,  úıdiń irgesinde kitap oqyp jatqan shaǵynda dostary aýlada láńgi oınap júredi. Dál sol kezde bir top orystyń geologtary kelip qalady. Sóıtse, oryssha sóıleıtin adam izdep júr eken. Ábishtiń oryssha kitap oqyp jatqanyn kórip, mynaý tildi biledi dep, anasynan surap alypty. Ony eki jyl ertip júrdi. Mańǵystaýdyń búkil taýyn, tasyn sonyń kómegimen jazyp alǵan. Sol kezden bastap Ábish ómirge etene aralasyp, geolog bolýdy armandaǵan. Osy armannyń jeteginde biraz jyl júrdi. Artynan kitapty kóp oqyǵannan keıin-aý deımin, jazýshylyǵy basym bolyp ketti", - dedi Klara apaı búgingi shara kezinde.

Aıta keteıik, búgin Lev Gýmılev atyndaǵy Eýrazııa ulttyq ýnıversıtetinde memleket jáne qoǵam qaıratkeri, xalyq jazýshysy Ábish Kekilbaev atyndaǵy aýdıtorııa ashyldy. "Búgin Ábish aǵanyń dúnıeden ozǵanyna jyl tolyp otyr. Jyldyq asy berilip jatyr. Sol kúnge sáıkestendirip, Eýrazııa ulttysh ýnıversıtetinde ataqty jazýshy, qoǵam qaıratkeri Ábish Kekilbaevtyń aýdıtorııasyn ashyp otyrmyz. Belgili tulǵalardyń esimimen aýdıtorııa ashý - bul ýnıversıtemizde qalyptasqan jaqsy bir dástúr. Óıtkeni sol tulǵalardyń ómiri, shyǵarmashylyǵy men qaıratkerliginen búgingi  jastar tárbıe alýy qajet", - deıdi ýnıversıtet rektory E.Sydyqov. Shara aıasynda ýnıversıtettiń jýrnalıstıka jáne saıasattaný fakýltetiniń 2-kýrs stýdenti Ázıza Súıinishqalıevaǵa Á. Kekilbaev atyndaǵy ataýly stıpendııa tabystaldy.