Ábilıazovtiń sybaılastary óz erikterimen Qazaqstanǵa oraldy

NUR-SULTAN. QazAqparat - Syrttaı 20 jylǵa sottalǵan BTA bankiniń burynǵy basshysy Muhtar Ábilıazovtiń sybaılastary óz erikterimen Qazaqstanǵa oraldy. Bul týraly búgin QR Sybaılas jemqorlyqqa qarsy is-qımyl agenttigi Asa mańyzdy qylmystyq isterdi tergeý departamentiniń basshysy Sergeı Perov aıtty, dep habarlaıdy QazAqparat tilshisi.

«2017 jyldyń 7 maýsymynda Almaty qalasynyń qylmystyq ister jónindegi mamandandyrylǵan aýdanaralyq soty uıymdasqan qylmystyq topqa basshylyq jasap, BTA bankiniń 7,5 mlrd dollar qarajatyn urlaǵany úshin basty fıgýrant Muhtar Ábilıazovti 20 jylǵa bas bostandyǵynan aıyrdy. Qabyldanǵan sharalardyń arqasynda BTA bankinen shamamen 2 mlrd dollar qaıtaryldy», - dedi ol.

Onyń atap ótýinshe, atalǵan qylmystyq is boıynsha 42 adam sottalǵan. Sońǵy ýaqytta izdeýde bolǵan 10 adam óz erikterimen Qazaqstanǵa kelgen. Olardyń qatarynda Jaqsylyq Járimbetov, Sádýaqas Mámesh, Qaırat Sadyqov syndy BTA-nyń top-menedjerleri bar.

«Olardyń barlyǵyn sot kináli dep tanydy. Degenmen, kinálaryn tolyq moıyndap, tergeý amaldaryna kómek kórsetkenderi úshin olarǵa shartty túrde jaza taǵaıyndaldy. Bıylǵy jylǵy mamyrda Qazaqstanǵa óz erikterimen oralǵan 7 tulǵaǵa qatysty tergeý amaldary aıaqtaldy. Olardyń qatarynda Ábilıazov baqylaýynda bolǵan «IPG Evrazııa», «Evrazııa Sıtı» jáne «Slavınvsetbank» kompanııalary Dırektorlar keńesiniń burynǵy tóraǵasy Artýr Trofımov bar», - dedi Sergeı Perov.