Ábilıazovtiń sybaılastary Qazaqstanǵa ózderi keldi - Ulttyq bıýro
Ábilıazovtyń sybaılastary bolyp sanalatyn BTA Bankiniń №6 Korporatıvtik bıznes basqarmasynyń burynǵy zańgeri Maksım Hablov pen Ábilıazovtyń baqylaýyndaǵy kompanııalardyń shartty jetekshisi Anar Ábdihaımova 2017 jyly 16 qazanda Reseı Federatsııasynyń Máskeý qalasynan Qazaqstanǵa óz erikterimen keldi.
«Olarǵa Muhtar Ábilıazovtyń uıymdasqan qylmystyq tobyna BTA Bankiniń aqshalaı qarajatyn jymqyrýǵa járdemdesti degen aıyp taǵylyp otyr. Hablov pen Ábdihaımova reseılik azamattyq alǵan jáne bul olardy Qazaqstanǵa ekstradatsııalaýǵa kedergi keltiredi. Biraq olar Sybaılas jemqorlyqqa qarsy is-qımyl Ulttyq bıýrosyna hat jazyp, Qazaqstanǵa óz erikterimen kelýge daıyn ekendikterin jetkizgen. Sybaılas jemqorlyqqa qarsy qyzmet atalǵan jaıt pen is boıynsha jınalǵan materıaldardy eskere otyryp, olarǵa qatysty buryn taǵaıyndalǵan bultartpaý sharalaryn ózgertti. Osydan keıin Hablov pen Ábdihaımova Qazaqstanǵa keldi», - delingen Ulttyq bıýro taratqan habarlamada.
Tergeý organynyń málimdeýinshe, buǵan deıin de BTA Bankiniń aqshalaı qarajatyn jymqyrý isi boıynsha birneshe kúdikti Qazaqstanǵa óz erikterimen kelgen.
«Bıylǵy shilde jáne qyrkúıek aılarynda Býdapesht qalasynan (Majarstan) Ábilıazovtiń kezinde Problemalyq nesıeler basqarmasy basshysynyń orynbasary bolǵan Erjan Qadesov jáne BTA Bankiniń №6 Korporatıvtik bıznes basqarma basshysynyń burynǵy orynbasary Záýre Júnisova Qazaqstanǵa erikti túrde kelgen edi.
Olar 2009 jyldan beri izdeýde júrgen jáne Qazaqstanǵa oralǵan soń, buryn taǵaıyndalǵan «qamaýǵa alý» bultartpaý sharasy jeńildetildi. Qazirgi ýaqytta joǵaryda kórsetilgen fıgýranttardyń qatysýymen qajetti tergeý amaldary júrip jatyr. Olar óz aıyptaryn tolyq moıyndap, BTA aqshalaı qarajattaryn mıllıardtap jymqyrý, baqylaýdaǵy kompanııalarǵa zańsyz nesıe berý jáne qymbat aktıvterdi satyp alý arqyly olardyń izin jasyrý jónindegi Ábilıazov áreketteriniń zańǵa qaıshy ekenin rastady», - dep habarlady Ulttyq bıýro.
Olar Ábilıazovtiń nusqaýymen kompanııalardyń shartty jetekshisi bolǵan jáne qajetti qujattarǵa qol qoıǵan, dep atap ótti mekeme.
«Sondaı-aq, olar qylmystyq is qozǵalǵan soń, Bank basshysyna qarsy kýálik berýdi boldyrmaý maqsatynda Ábilıazovtiń tapsyrmasymen sybaılastary Bank qyzmetkerlerin jáne baqylaýdaǵy kompanııalardyń basshylaryn qorqytý jáne bopsalaý jolymen Qazaqstannan shyǵarýdy uıymdastyrǵan.
Sol sebepti Ábilıazovtyń kezinde BTA bankte jumys istegen kóptegen qyzmetker elden ketýge májbúr bolǵan. Jyraqta júrgende de qorqytyp-úrkitýler jalǵasyp, olardyń Qazaqstanǵa oralýyna múmkindik bermegen. Qazirgi ýaqytta joǵaryda atalǵan tulǵalarǵa qatysty sotqa deıingi tergeý jalǵasýda, olar tergeýge belsene kómek kórsetip, Ábilıazovtiń qylmystyq tobynyń zańǵa qaıshy is-áreketteri týraly jańa faktilerdi ashty», - delingen Sybaılas jemqorlyqqa qarsy qyzmettiń habarlamasynda.
