Ábilıazovtiń offshorlyq kompanııasy «BTA» bankinen qaıtarymsyz nesıe alǵan
ALMATY. QazAqparat - Muqtar Ábilıazovtiń offshorlyq kompanııalary aınalymdaǵy qarjysyn arttyrý úshin «BTA» bankinen qaıtarymsyz nesıeler alyp otyrǵan, dep habarlaıdy QazAqparat tilshisi Almatydaǵy Qylmystyq ister jónindegi mamandandyrylǵan aýdanaralyq sotynda ótip jatqan basty sot otyrysynan.
Brıtandyq Vırgınııa araldarynda tirkelgen Muqtar Ábilıazovtyń baqylaýyndaǵy «Fedelm corp» offshorlyq kompanııasy «BTA bankinen» zańsyz 135 mln AQSh dollary kóleminde kepilsiz nesıe alǵan.
Muhtar Ábilıazov jáne onyń sybaılastaryna qatysty ótip jatqan basty sot talqylaýynda jábirlenýshi taraptyń ókili Talǵat Amantaı aıtty.
«BTA» bank ókili Talǵat Amantaıdyń aıtýynsha, banktiń sol kezdegi basshylyǵy kompanııa dırektorynyń atynan mıllıondaǵan nesıeni alýǵa ótinish daıyndaǵan. Ótinishtiń maqsaty retinde «Alaý So» JShS-nyń jarǵylyq kapıtalyn satyp alý kórsetilgen. Atalǵan kompanııa da Muqtar Ábilıazovtyń baqylaýynda bolǵan. Naqtyraq aıtqanda, Muqtar Ábilıazovtiń bir kompanııasy mıllondaǵan nesıeni alyp, basqa kompanııasyna aýdarǵan.
«Banktiń óz ishindegi talaptary men normatıvtik qujattary sharttaryn buza otyryp, eshqandaı nesıe alýǵa qajetti qujattary bolmasa da «Fdelm corp» kompanııasyn nesıeleý úshin lımıt belgileýge sheshim shyǵarylǵan», - dedi Talǵat Amantaı.
Osydan keıin bank basshylyǵy tarapynan «Fdelm corp» kompanııasyna 135 mln dollar jeńildetilgen nesıe berý týraly saýalnama paraǵy ázirlenip, nesıeleý komıtetine berilgen. Nesıeleý komıteti bólimi tikeleı Áblıazovqa baǵynyshty bolǵandyqtan kóp kúttirmeı qysqa merzim ishinde bir kúndik kompanııany qarjylandyrýǵa sheshim shyǵaryp bergen.
«Fdelm corp» kompanııasy Bank qarjysyn jymqyrý maqsatynda zańdy negizde nesıe alý úshin arnaıy qurylǵan», - dedi Bank ókili.
Eske sala keteıik, basty sot talqyldaýynda aıyptalýshy retinde BTA bankiniń burynǵy top-menedjerleri qatysyp otyr. Naqtyraq aıtqanda, BTA bankiniń burynǵy tóraǵa orynbasary Jaqsylyq Jarymbetov, nesıeleý boıynsha burynǵy dırektor Qaırat Sadyqov, burynǵy basqarma basshysy Sadýaqas Mámesh bar.
