Ábilıazov taýyq sandaryn 40 mln dollarǵa satyp alǵan
ALMATY. QazAqparat - Almaty qalasynyń Qylmystyq ister jónindegi mamandandyrylǵan aýdanaralyq sotynda Muhtar Ábilıazovtiń isine qatysty basty sot otyrysy ótip jatyr.
Búgingi sot otyrysynda Ábilıazovtiń baqylaýynda bolǵan offshorlyq kompanııalardy bank esebinen nesıeleýge qatysty birqatar oqıǵalar qaraldy, dep habarlaıdy QazAqparat tilshisi.
«2008 jyly «Grove Services, Inc» jáne «Daniels Tradekorp Inc» offshorlyq kompanııalary arasynda 50 myń tonna muzdatylǵan taýyq sandaryn jetkizý týraly shart jasalady. BTA bank osy kelisimsharttyń júzege asýy úshin 40 mln AQSh dollary bolatyn nesıe júıesin iske qosqan», - dedi búgin sotta jábirlenýshi tarap, bank ókili Talǵat Amantaı.
Bul nesıeleý oqıǵasynda taýyq sandaryn satyp alý máselesi bekerden oılastyrylmaǵan. Bank basshylyǵy osy keste arqyly kózboıaýshylyq jasap, eki kompanııa arasynda kommertsııalyq baǵyt bar degendi kórsetkisi kelgen.
Alaıda, is barysynda «Daniels Tradekorp Inc» kompanııasynyń quryltaıshylary týraly qujatty №6-shy nesıeleý bóliminiń qyzmetkerleri ázirlegeni anyqtaldy. Bul bólim qyzmetkerleri tikeleı Ábilıazovke baǵynyp, «bir kúndik» kompanııalar ashýmen aınalysqan.
Bank ókiliniń aıtýynsha, kepil qoıylmaǵanyna qaramastan, bank Ábilıazevtiń eki kompanııasynyń kelisimshartyn qarjylandyrýǵa 40 mln dollar qarajat bólgen. Munymen qoımaı, «Daniels Tradekorp Inc» kompanııasynyń dırektory Suseth Walthia Parris-tiń qatysýynsyz kelisimshart jasalǵan. Tipti, ondaı adam ómirde joq ta bolýy ǵajap emes. Óıtkeni, nesıeleý bóliminiń bir de bir múshesi bul kompanııa basshylarymen kezdespegen, barlyq qajetti qujattardy Ábilıazovtiń jaqyn adamdarynan alyp otyrǵan.
Qoryta aıtqanda, Ábilıazov taýyq sandaryn syltaý qylyp, BTA bankinen 40 mln dollar jymqyrady. Bul qarajattar sol kúıi qaıtarylmaǵan.
