Ábilıazov BTA bankten urlaǵan aqshasyn ózi zańdastyryp otyrǵan
ASTANA. QazAqparat - Almaty qalasynyń qylmystyq ister jónindegi mamandandyrylǵan aýdanaralyq sotynda qashqyn bankır Muhtar Ábilıazov pen onyń sybaılastaryna qatysty qylmystyq isti qaraý odan ári jalǵasýda. Sottyń búgingi otyrysynda Muhtar Ábilıazovtiń «bir kúndik» kompanııasyna mıllıardtaǵan nesıelerdi berýge qatysty qylmystyq kestesi jarııa boldy. Atap aıtarlyǵy, BTA bankten nesıege berilgen mıllıardtar qaıtarylmaǵan, túptep kelgende Muhtar Ábilıazovtiń jeke shotyna túsip otyrǵan.
2007 jyldyń tamyz aıynda Ábilıazov «Kamenskoe plato» jaýapkershiligi shekteýli seriktestiginiń jarǵylyq kapıtalynyń 99 paıyzdyq úlesin satyp alý jóninde jalǵan mámileni iske asyrady. Úlesti alaıaq bankırdiń offshordaǵy «Gambac Limited» kompanııasy satqan.
Alaıda, arada bir aı ýaqyt ótkende Ábilıazov óziniń baqylaýynda ustaǵan «Mıtra kompanııasy» atty jańa kásiporyn qurylady. Sol kezeńde Ábilıazovtyń nusqaýymen «Mıtra kompanııasy» jaýapkershiligi shekteýli seriktestigin BTA bank 17,5 mıllıard teńgege qarjylandyrady. Atap aıtarlyǵy, birneshe mıllıardtaǵan nesıeni alý úshin M. Ábilıazov «Kamenskoe plato» JShS-niń úlesin satyp alady. Ol alaıaqtyq áreketin iske asyrý maqsatynda «Kamenskoe plato» JShS-in bar-joǵy 101 myń teńgege satyp alypty.
Bul qaryzdy maquldaý kezinde BTA banktiń nesıe komıtetiniń músheleri qaryz alýshynyń qaıtadan qurylǵan aktıvi joq kompanııa ekenine nazar aýdarmaǵan. Óıtkeni, olar qaryz alýshynyń Ábilıazovtiń ózine tikeleı baǵynyshty kompanııa ekenin aldyn-ala bilgen.
2007 jyldyń qarasha aıynda Muhtar Ábilıazov pen «Mıtra kompanııasy» arasynda «Kamenskoe plato» JShS-niń úlesin satyp alý-satý týraly mámile jasalady. Al, atalǵan qarajat Ábilıazovtyń banktegi jeke shotyna aýdarylǵan. Ol osy aqshany BTA banktiń aktsııalaryn satyp alýǵa jumsaǵan kórinedi.
Osyndaı keste (BTA bankten nesıege alǵan aqshaǵa banktiń aktsııalaryn satyp alǵan) boıynsha Muhtar Ábilıazov BTA banktiń negizgi aktsıoneri bolyp shyǵa kelgen. Mundaı qylmystyq kesteniń kómegimen Ábilıazov kem degende eki ese paıdaǵa kenelgen. Birinshiden, onyń BTA banktegi úlesi ulǵaıady, ekinshiden, ol urlaǵan aqshasynyń tolyǵymen izin jasyryp otyrǵan.
2008 jyldyń qyrkúıek aıyna deıin Muhtar Ábilıazov baǵaly qaǵazdardy satýdan qyrýar paıdaǵa keneledi. Keıinirek tapqan tabysyn 156 mıllıon AQSh dollaryna óziniń «Johnson Quality Products» offshorlyq kompanııasyna satý týraly sheshim qabyldaıdy. Aıtarlyǵy, bul da BTA bankten alǵan nesıe aqshalar bolatyn.
Saıyp kelgende M. Ábilıazov 156 mıllıon AQSh dollaryn «Trasra Kommercbank» latvııalyq bankiniń kómegimen «Forest Management LTD» offshorlyq kompanııasynyń shotyna aýdarady. Ol aqshaǵa shetelden quny qymbat jyljymaıtyn múlik satyp alady.
Aıta ketelik, qashqyn bankır Muhtar Ábilázovtiń qylmystyq isi boıynsha basty sot otyrysy aǵymdaǵy jyldyń 3-inshi sáýirinde bastaldy. Sot otyrystaryna úsh memlekettik aıyptaýshy, sottalýshylardyń qorǵaýshylary jáne BTA bankiniń ókili qatysýda. Qylmystyq istiń jalpy kólemi 2 224 tomnan turady. Aıyptaýshylar tiziminde 200-den astam kýágerler bar. Muhtar Ábilázovtiń ózi alǵashqy sot otyrysynan bastap sotqa kelgen joq. Onyń múddesin sotta memleket belgilegen qorǵaýshy Anjelıka Ájiǵulova qorǵaýda.
