Ábilıazov BTA banki aqshasyn Seıshel araldaryna qalaı jylystatty
ASTANA. QazAqparat - Muhtar Ábilıazov pen onyń sybaılastarynyń isine qatysty kezekti sot otyrysynda Seıshel araldarynda tirkelgen offshorlyq kompanııalarǵa BTA bankiniń aqshalaryn jylystatý syzbasyna qatysty birneshe oqıǵa qaraldy, dep habarlaıdy QazAqparat.
Zardap shegýshi tarap ókiliniń aıtýynsha, 2007 jyldyń aqpanynda «Beltor Limited» kompanııasy (Seıshel araldarynda tirkelgen) BTA bankine birneshe mıllıondaǵan nesıe alý úshin ótinim bergen. Maqsaty retinde Almaty qalasy men Almaty oblystarynda jyljymaıtyn múlikti satyp alý dep kórsetken. Al kompanııanyń jarǵylyq kapıtaly nebári 5 myń AQSh dollary ǵana bolǵan. Biraq kredıttik ótinimniń jalǵan ekendigi kórinip turǵandyǵyna, kepildik múlkiniń, kompanııanyń qurylýy, onyń tólem qabilettiligi týraly málimetteriniń bolmaýyna qaramastan nesıe berilgen. Bul oraıda BTA banki basshylyǵynyń nesıe komıtetine joldanǵan tapsyrmasy sheshýshi ról oınaǵan. Nátıjesinde birkúndik kompanııa ótinimi qajetti saraptamasyz sanaýly kúnderdiń ishinde maquldanǵan.
Mundaı jedel áreket etýge Muhtar Ábilıazovtiń affılırlengen offshorlyq kompanııalarǵa nesıe berýdi jeke ózi baqylaýynda ustaýy sebep bolǵan.
«Bankke «Beltor Limited» kompanııasy dırektory atynan 29 mıllıon dollar somaǵa nesıe bólý týraly ótinim jazylǵan. 2007 jyldyń 22 aqpanynda kredıttik komıtet tarabynan zańsyz oń sheshim qabyldanyp, oǵan sáıkes «Beltor Limited» kompanııasyna 29 mln. dollar somasynda nesıe berý maquldandy. Atalǵan hattamaǵa máseleni kredıttik komıtet otyrysyna qaramastan basshylar Jarymbetov pen Solodchenko qol qoıǵan»,- dedi BTA bankiniń ókili.
Araǵa eki aı ýaqyt salyp «Beltor Limited» kompanııasynyń dırektory atynan 20 mln. dollar nesıe bólý týraly ekinshi ótinim kelip túsken. Tez arada bul ótinim de maquldanǵan. Osylaısha nesıe somasy shamamen 50 mln. dollardy qurady. Bul zaım kepildik múlikpen qamtamasyz etilmegen jáne qaıtarylmaǵan. Bank tarabynan bólingen qarjy aldymen Latvııa bankteriniń birine aýdarylyp, keıinnen Ábilıazovtiń qaltasyna túsken.
Dál osyndaı jolmen Rimos Limited, Winterra Holding, Toros Limited, Starwood Contract Limited, Netgold Servises Limited, Highbond Associates Limited syndy kompanııalarǵa nesıe bólingen. Atalǵan kompanııalardyń barlyǵy da Seıshel araldarynda tirkelgen.
