Ábilmansur Batyrǵalı TMD elderi oıyndarynyń kúmis júldegeri atandy
Atyraý oblystyq dene shynyqtyrý, sport jáne týrızm basqarmasynyń baspasóz qyzmetinen málim etkendeı, qazaqstandyq karateshiler tabysty óner kórsetti.
«Belarýs Respýblıkasyndaǵy Mogılev qalasynda ótip jatqan TMD elderiniń II oıyndarynda atyraýlyq karateshi Ábilmansur Batyrǵalı baq synady. Ol el namysyn 75 keli salmaqta qorǵap, kúmis medalǵa ıe boldy», -dep habarlady basqarmanyń baspasóz qyzmeti.
Ábilmansur Batyrǵalı – álemge endi tanyla bastaǵan jas sportshy. Álemniń birneshe elinde ótken halyqaralyq dodalarda top jarǵan.
Máselen, jastar arasynda óziniń myqty sportshy ekenin dáleldep, álem chempıony atanǵan.
Keıin eresekter arasyndaǵy Azııa chempıonatynyń kúmis júldesin ıelengen. Osyndaı tabysy úshin karate-dodan halyqaralyq dárejedegi sport sheberi atanǵan.
Eske sala ketelik, budan buryn Jeńis Nurlybaev djıý-djıtsýdan álemniń eki dúrkin chempıony atanǵanyn habarlaǵan bolatynbyz.
Bul – Jeńis Nurlybaevtyń álemdik dodadaǵy ekinshi jeńisi.
Ol 2021 jyly Birikken Arab Ámirliginiń astanasy Abý-Dabı qalasynda sporttyń osy túrinen ótken álem chempıonatynda alǵashqy altyn medalge ıe bolǵan edi
Al Mońǵolııada ótip jatqan álem chempıonatynda atyraýlyq taǵy úsh sportshy tabysty óner kórsetti. Onyń biri – áıelder arasynda synǵa túsken Áıgerim Tóreǵojına kúmis medaldy ıelendi.
Sondaı-aq atyraýlyq ardager sportshy Rýslanhan Madyhanov ta álem chempıony ataǵyna qol jetkizdi. Taǵy bir ardager sportshy – Atyraý oblystyq djıý-djıtsý federatsııasynyń prezıdenti Esenǵalıev Aıbar qola júldege ıe boldy.
Foto: Atyraý oblystyq dene shynyqtyrý, sport jáne týrızm basqarmasy
