Ábilqaıyr Ysqaqov Pavlodardaǵy ekologııa máselesin sheshýdiń eki tásilin aıtty
PAVLODAR. QazAqparat – Pavlodar oblysynyń ákimi ákimi Ábilqaıyr Ysqaqov oblystaǵy ekologııalyq máseleni sheshýdiń eki tásilin atap ótti, dep habarlaıdy QazAqparat tilshisi.
«Negizgi másele – lastaýshy zattardyń mólsheri. 2019 jyly ol 717 myń tonnany quraǵan, bul el ishindegi Pavlodar oblysynyń antırekordy», - dedi Pavlodar oblysynyń ákimi Ábilqaıyr Ysqaqov Estaı atyndaǵy Mádenıet úıinde halyqqa esep berý kezinde.
Onyń pikiri boıynsha, jaǵdaıdy jaqsartýdyń eki negizgi tásili bar.
«Birinshisi – eń ozyq qoljetimdi tehnologııalardy engizý. Eýropada osy tájirıbe qoqystardy 94 paıyzǵa qysqartty, biz de sondaı jetistikke jetýge tyrysamyz. Eń ozyq qoljetimdi tehnologııalardy engizgen mekemeler qorshaǵan ortaǵa emıssııa tóleýden bosatylady; engizbegenderdiń mólsherlemesi arta beredi. Jaqynda jańa Ekologııalyq kodeks shyǵady: Ekologııa mınıstrligi eń ozyq qoljetimdi tehnologııalardy birinshi bolyp engizetin top-50 kompanııany iriktep aldy, olardyń qatarynda –oblysymyzdaǵy ónerkásip mekemeleri bar.
Onyń aıtýynsha, ónerkásip mekemelerimen birlesip aýdandaǵy qoqys kólemin qysqartýǵa barlyq múmkindik qarastyrylǵan.
«Ekinshi tásili – kógaldandyrý. Tabıǵat paıdalanýshylary ózderiniń sanıtarlyq zonalaryn qajetti normaǵa deıin kógaldandyrýy qajet. Aýdandaǵy 16 iri mekeme on paıyz jerdi de kógaldandyrmaıdy! Bul ekologııalyq mádenıettiń tómen ekendigin kórsetedi», - dep atap ótti Á. Ysqaqov.
Pavlodar oblysynyń ákimi oblys turǵyndary men keler urpaqtyń densaýlyǵy úshin bıznes-qaýymdastyq pen qarapaıym azamattar arasynda ekologııalyq mádenıetti nasıhattap, damytý kerek dep esepteıdi.
