Ábilqaıyr Sqaqov jumys saparymen Ekibastuzǵa bardy
B.Nurjanov atyndaǵy GRES-1-de oblys ákimine óndiristegi jaǵdaı men kómir qory týraly aıtyldy. Búgingi kúni kásiporynnyń qoımalarynda 254 myń tonna qatty otyn bar, bul rezerv 7 kúnge jetedi. Degenmen Ábilqaıyr Sqaqov stantsııadaǵy kómir qoryn kóbeıtýdi tapsyrdy.
« Jaǵdaıǵa jeńil qaraýǵa bolmaıdy. Qatty otyndy qabyldaýdy ońtaılandyryp, onyń qoryn normatıvke deıin jetkizý qajet»,-dedi oblys ákimi GRES-1 basshylyǵyna.
GRES-2 jetekshileri óńir basshysyna №3 energobloktyń qurylysyna daıyndyq jumystary jalǵasyp jatqandyǵyn habarlady. Olardyń aıtýynsha, qazir jobanyń tehnıkalyq jáne qarjylyq aýdıti júrgizilip jatyr. Sonymen qatar kásiporyn Qytaıdan 7 myń tonnadan astam jabdyqtyń jetkizilýin kútip otyr.
«Jaqynda bizde energetıka mınıstri Nurlan Noǵaev boldy, onymen atalǵan jobany talqyladyq. Bir jaqqa shyqtyq dep aıta alamyz. Jobalaý-smetalyq qujattamany túzetýdi aıaqtaǵan boıda ony memlekettik saraptamaǵa tapsyramyz», - dep atap ótti kásiporyn basshysy Vladımır Astashov.
Ekibastuz jylý elektr ortalyǵynda oblys ákimine jylytý maýsymynyń barysy týraly baıandaldy. Olardyń málimeti boıynsha, qalanyń keıbir kóp qabatty úıleriniń turǵyndary mezgil-mezgil jylýdyń jetkiliksizdigine shaǵymdanady. Jylý berýshiler bul máseleni keıbir úılerdiń óz páterlerinde ystyq bolýy úshin sorǵylardy jylý jelilerine kelisimsiz qosatyndyǵy saldarynan, ózge úıler men páterlerdi tıisti deńgeıde jylytý múmkin emestigimen túsindirdi. Ábilqaıyr Sqaqov bul máseleni sheshýdi tapsyrdy.
«Shamadan tys jylýdy ózdiginen qamtamasyz etip otyrǵan paıdalanýshylardy anyqtaý kerek. Bul sonshalyqty qıyn emes: PIK-pen jumys istep, jylý-tehnıkalyq esepterdi júrgizý jáne jylý tasymaldaǵyshtyń kiris pen shyǵystaǵy parametrlerin ólsheý kerek», - dedi ol.
Óńir basshysy qalalyq polıtsııa basqarmasynda da boldy. Bólim bastyǵy Vasılıı Sklıardyń aıtýynsha, 2021 jyldyń alǵashqy kúninde qalada tek eki qylmys tirkelgen. Eki jaǵdaıda da buryn kólik júrgizý quqyǵynan aıyrylǵan mas júrgizýshiler ustaldy. Jalpy tártip saqshylary Ekibastuzdaǵy jaǵdaıdy turaqty dep baǵalady.