Ábilqaıyr Sqaqov sybaılas jemqorlyqqa qarsy kúres jumystaryn synǵa aldy
Jıynǵa qatysqan QR Memlekettik qyzmet isteri agenttigi Pavlodar oblysy boıynsha departamentiniń basshysy Toqtamys Jumaǵulov resmı organdardaǵy memlekettik qyzmet kórsetýdiń sapasy týraly baıandady. Onyń sózine qaraǵanda, 2019 jyly júrgizilgen tekserister nátıjesinde memlekettik qyzmet kórsetý salasynda 3719 ereje buzýshylyq anyqtaldy. Memlekettik mekemeler men uıymdardyń 10 qyzmetkeri tártiptik jaýapkershilikke tartylyp, 17 ákimshilik is qozǵaldy. Oǵan qosa, memleket paıdasyna 467 myń teńge kóleminde aıyppul óndirildi.
Óz kezeginde, oblystyq aqparat jáne qoǵamdyq damý basqarmasy basshysynyń mindetin atqarýshy Rýslan Tileýlesov osy baǵyttaǵy ıdeologııalyq jumys týraly aıtty. Sheneýniktiń sózine sensek, atqarylǵan jumystyń nátıjesinde halyqtyń 85%-y antıkorrýptsııalyq saıasatty qoldaıtyn bolǵan. Oblys ákimi Ábilqaıyr Sqaqov atalǵan sandardyń shynaıylyǵyna kúmán keltirip, óńirimizde sybaılas jemqorlyqqa qarsy is-qımyl jónindegi jumysty synǵa aldy. - Korrýptsııaǵa qarsy nóldik shydamdylyqty qalyptastyrý boıynsha jumys jetkilikti deńgeıde emes, tipti keı jaǵdaıda sóz júzinde ǵana júrgizilýde, - dedi Ábilqaıyr Sqaqov. – Sońǵy tórt aıda tirkelgen qylmystar sanynyń ósimi istiń tıimsizdigin dáleldeıdi. Máselen, ótken jylmen salystyrǵanda sybaılas jemqorlyqqa qatysty qylmystar 28-den 69-ǵa, paraqorlyq 14-ten 52-ge ósken. Bul - jer-jerlerdegi jumystyń formaldi júrgizilýiniń nátıjesi.
Osy oraıda óńir basshysy memlekettik qyzmet kórsetý isin barynsha tsıfrlandyrýdy qamtamasyz etip, kóleńkeli ekonomıkanyń úlesin maksımaldy túrde qysqartýdy tapsyrdy.