Ábilqaıyr Sqaqov Pavlodardy qardan tazartý jumysyn synǵa aldy
PAVLODAR. QazAqparat - Ábilqaıyr Sqaqov Pavlodardaǵy kóktemgi kórkeıtý jumystaryna daıyndyqty tekserdi, dep habarlaıdy QazAqparat oblys ákiminiń baspasóz qyzmetine silteme jasap.
Oblys ákimi qalanyń qazylyp, sý basqan jol ýchaskelerin aralap, saıabaqtardan, aýlalardan jáne jer úıleri mańyn qardan tazalaý barysyn tekserdi.
Ábilqaıyr Sqaqov aldymen qalanyń ortalyq jaǵalaýynyń eski bóligine bardy. Ol qar úıindilerine nazar aýdaryp, jaǵalaýdaǵy serýendeý aımaǵynyń bir deńgeıinen ekinshisine ótýge arnalǵan baspaldaqtardyń nashar tazalanǵanyn atap ótti. Sondaı-aq, oblys ákimi «Balalyq shaq» saıabaǵyn (burynǵy Lenpark) kútip ustaý jaǵdaıyn qanaǵattanarlyqsyz dep baǵalady.
«Bul shaǵyn saıabaqtyń ózinde eki jaıaý júrginshi joldyń tek bireýi tazalanǵan», - dedi ol.
Aımaq basshysy kommýnıkatsııa men jol qyzmetiniń jumysyndaǵy kemshilikti synǵa aldy. Ol qala aýmaǵyndaǵy jeli ótkizilgen jóndeý jumysynan keıin jaıaý jolaýshylar úshin jaǵdaı jasalmaıtynyn aıtyp, jýyrda ınjenerlik kommýnıkatsııalar jóndelip, sý qubyrlary tartylǵan Á.Bókeıhan jáne akademık Shokın kóshelerindegi jaǵdaıdy mysalǵa keltirdi.
«Ýchaskedegi jumystar aıaqtalǵannan keıin jaıaý jolaýshylar joly tıisti jaǵdaıǵa nege keltirilmegen? Bul turǵyndardyń jıi paıdalanatyn joly, adamdar bolsa, basqa jol izdep, osy tusty aınalyp ótýge májbúr», - dep surady Á.Sqaqov, akademık Shokın kóshesindegi 31-úıdiń janyndaǵy jaıaý júrginshiler jolynda turyp.
Nýrkın men Teplov, Şedrın jáne Tselınnaıa kósheleriniń qıylystarynda oblys ákimine erigen sýdan tazalaý jumystarynyń barysy jóninde baıandama jasaldy. Qalada 10 assenızator mashına jumys istep jatyr. Keıbir jaǵdaılarda joldy qurǵatý úshin arnaıy tehnıka birneshe reıs jasaıdy.
«Bul kóshelerdegi qardyń der kezinde shyǵarylmaǵandyqtyń saldary. Joldardy sýdan jyldam qurǵatý kerek», - dedi aımaq basshysy.
Qar tazalaýdyń álsiz júrgizilgendigi týraly «Ekinshi Pavlodar» turǵyndary da aıtty. Rostovskaıa kóshesindegi jeke úı ıeleriniń biri osy aýmaqta qar jınaý tehnıkasyn bıyl bir-aq ret kórgenin aıtty. Bul jerdegi qar úıindileri erigennen keıin aýlany sý basýy yqtımal. Máshhúr Júsip kóshesindegi N40 úıdiń aýlasynda da dál osyndaı jaǵdaı. Ábilqaıyr Sqaqov jekemenshik úı sektorlary men kóp qabatty úılerdiń aýlalarynan qardan jyldam tazartyp, bul jumys júrgiziletini jóninde turǵyndardy aldyn-ala eskertilýin tapsyrdy.
Ákim «Dachnyı» shaǵyn aýdanyndaǵy Kamzın kóshesi boıyndaǵy erigen sýdyń áserinen asfaltbeton jabyny oıylǵan jerge bardy. Buǵan deıin áleýmettik jelide tótenshe jaǵdaı qaýpi týraly shaǵymdar jarııalanǵan.
«Bul jer áli kúnge deıin nege qorshalmaǵan? Túnde bul shuńqyrǵa adam da, kólik te qulap ketýi múmkin. Muny tez arada qorshatyńyzdar», - dedi aımaq basshysy.
Gagarın saıabaǵyn aralaǵan ákim qala baqshalarynyń kópshiliginde abattandyrýǵa bolatyn bos alańdar bar ekenin eske salyp, osy máseleni aldaǵy maýsymda ótkiziletin jumys barysynda eskerýdi tapsyrdy.
«Aǵashtar tek qoǵamdyq baqtarda ǵana emes, aýlalarda, qala kósheleriniń boıynda da otyrǵyzylýy kerek. Saıabaqtar máselesine oralar bolsaq, qala turǵyndary arasynda saýalnama júrgizińiz: bizdiń jasyl alqaptarda ne jetispeıdi, olardy qalaısha jaqsartsa bolady? Saýalnama nátıjeleri saraptalǵannan keıin ár saıabaqty jaqsartýdy bólek josparlaýǵa bolady», - dedi ákim.
Kórgen jaǵdaılardy qorytyndylaı kele, Ábilqaıyr Sqaqov qala basshylyǵy men kommýnaldyq qyzmetterdiń aldynda úlken jumys turǵanyn aıtty. Ol qysta bolǵan avarııalar saldaryn joıý barysynda jóndeý júrgizilgen jerlerdi qalpyna keltirip, qala kósheleriniń tesigin jamaý jumysynyń kestesin qurýdy tapsyrdy. Ákim atap ótkendeı, joldy qalpyna keltirý jumystaryn tıimdi ári jyldam ótkizý úshin oblystaǵy barlyq jóndeý qyzmetteri jumyldyrylýy kerek.
