Ábilqaıyr Sqaqov Pavlodardaǵy provızorlyq aýrýhanalarda boldy
PAVLODAR. QazAqparat - Medıtsına qyzmetkerlerimen kezdesýler barysynda Pavlodar oblysynyń ákimi olarǵa janqııarlyq jumystary úshin alǵys bildirdi jáne óńirdegi epıdemıologııalyq jaǵdaıǵa qatysty eskertýleri men usynystaryn tyńdady, dep habarlaıdy Ravlodarnews.kz.
Oblys ákimi baspasóz qyzmetiniń málimdeýinshe, naýqastarmen sóılesken kezde ákim olarǵa tezirek saýyǵyp ketýdi tilep, medıtsınalyq qyzmetterdiń sapasy men aýrýhanadaǵy jaǵdaı týraly surady. Óńir basshysy Sultanov atyndaǵy oblystyq aýrýhanada, №1 jáne №3 qalalyq aýrýhanalarda, sondaı-aq oblystyq kardıologııalyq ortalyqta boldy. Ábilqaıyr Sqaqov oblystyq aýrýhananyń jańa ǵımaratynyń jáne №1 qalalyq aýrýhananyń qabyldaý bólimine qosymsha orynjaıdyń qurylys barysymen tanysty.
Pavlodar oblystyq kardıologııalyq ortalyǵynda ákim oblystyń bas shtattan tys reanımatology Inna Glovatskaıamen birge provızorlyq jáne jansaqtaý bólimshelerine bardy. Búginde ortalyqta 107 naýqas statsıonarlyq jaǵdaıda, 18 adam jansaqtaý bóliminde em alýda. Oblys ákimi naýqastardan medıtsınalyq kómektiń sapasy, tamaqtaný, dári-dármekter jáne basqa zattar týraly surady.
- Jatqanyma úshinshi kún boldy. Men munda entigýmen keldim. Búgin men jaqsy júrip jatyrmyn, dem alý ońaı. Biz barlyq protsedýralardy ýaqtyly alamyz, - dedi provızorlyq aýrýhananyń patsıenti Ábilqaıyr Sqaqovqa.
- Medıtsına qyzmetkerleri jaqsy. Olar palataǵa kúnine 5-6 ret kiredi. Tamaq jaqsy. Dári-dármekter jetkilikti, - dedi basqa naýqastar ákimge.
Jansaqtaý bóliminde Inna Glovatskaıa óńir basshysyna qolda bar jabdyq, onyń jumysy jáne aýyr naýqastardy emdeý taktıkasy týraly aıtyp berdi. Ábilqaıyr Sqaqov ortalyqtyń patologııalyq-anatomııalyq bóliminde de boldy. Ákim №1 qalalyq aýrýhanada osyndaı profıldegi bólimniń jumysymen tanysty.
Barǵan medıtsınalyq uıymdardyń barlyǵynda ákim ujymmen sóılesip, medıtsına qyzmetkerleriniń óńirde oryn alǵan epıdemıologııalyq jaǵdaıǵa qatysty pikirlerin tyńdady. Olardyń aıtýynsha, aýrýhanaǵa aýyr halde túsken naýqastardyń kópshiligi úıde ózin-ózi emdegen adamdar. №3 qalalyq aýrýhananyń jansaqtaý bóliminiń meńgerýshisi Vasılıı Pavlov atap ótkendeı, ókinishke oraı, kóptegen adamdar antıbıotıkterdi júıesiz túrde qabyldaǵan. Al bul patsıentterdiń jaǵdaıyn da, olardyń emin de kúrdelendirip jiberdi. Provızorlyq aýrýhanalardyń dárigerleri alǵashqy medıtsınalyq-sanıtarlyq kómekti kúsheıtý týraly aıtty, óıtkeni onyń sapasy adamnyń úıde emdeletinine nemese aýrýhanaǵa jatatynyna baılanysty bolady.
Ábilqaıyr Sqaqov alǵashqy medıtsınalyq-sanıtarlyq kómektiń sapasyn jáne basqa da birqatar mańyzdy baǵyttardy jaqsartý boıynsha shildeniń basynan bastap qabyldanǵan shuǵyl qosymsha sharalar týraly aıtty. Oblysta patsıentterdiń úıine baratyn mobıldi toptardyń sany artty. 91 brıgada jeke qorǵanys quraldarymen jáne sapaly medıtsınalyq qyzmet kórsetý úshin qajetti barlyq zattarmen qamtamasyz etilgen. Olardyń jumysyn sonymen qatar dárigerler men jedel shtabtarǵa keńes berý úshin aımaq basshysy shaqyrǵan Qoǵamdyq sarapshylar keńesi qadaǵalaıdy. Sonymen qatar oblys ákiminiń bastamasymen oblysta dári-dármektiń turaqtandyrý qory quryldy. Ábilqaıyr Sqaqov basqaratyn jedel shtab týyndaǵan máselelerdi jedel sheshý úshin kúndelikti onlaın-keńester ótkizip otyrady.
- Negizgi mindetterdiń biri - emhanalar, jedel járdem jáne aýrýhanalar arasynda tıimdi baılanys ornatý. Olardyń tyǵyz ózara árekettestigi jáne ýaqtyly baqylaýlarmen almasýy tıimdi sheshimder qabyldaýǵa yqpal etedi, óńirdegi epıdemıologııalyq jaǵdaıdy jaqsartý protsesin edáýir jedeldetedi. Bizdiń strategııalyq maqsatymyz - ambýlatorııalyq naýqastardyń aýrýhanalarǵa, al aýrýhanalardaǵy patsıentterdiń jansaqtaý bólimine túspeýi, - dedi Ábilqaıyr Sqaqov. - Aýrýhanalar dári-dármektermen qamtamasyz etilgen, «SK-Farmatsııa» jetkizilimderdi arttyryp jatyr. Qajetti qural-jabdyqtar bar. Qosymsha qor úshin ottegi kontsentratorlary men ókpeni jasandy jeldetý apparattaryn satyp alýdy jalǵastyramyz. Ottegi núkteleriniń sany búginde 226-dan 376-ǵa deıin kóbeıtildi, aıdyń aıaǵynda biz ony 500-ge jetkizýdi josparlap otyrmyz.
Sondaı-aq Ábilqaıyr Sqaqov eki qurylys alańyn - №1 qalalyq aýrýhananyń qabyldaý bólimine qosymsha orynjaıyn jáne oblystyq aýrýhananyń ınfektsııalyq jáne teri-venerologııalyq bólimderdiń jańa korpýsyn aralady.
Kólemi 2,8 myń sharshy metrden astam qosymsha orynjaı osy jyldyń sońyna deıin tapsyrylady dep josparlanýda. Jańa orynjaıda qabyldaý bólimi, operatsııalyq blok jáne jansaqtaý bólimi ornalasatyn bolady. Merdigerlermen áńgime barysynda oblys ákimi olarǵa qurylys-montaj jumystaryn belgilengen kestege sáıkes júrgizýdi tapsyrdy jáne ol jumystardyń sapasy birinshi kezekte mańyzdy ekenin eske saldy.
Infektsııalyq bólimshe ornalasatyn oblystyq aýrýhana ǵımaratynda qazirgi ýaqytta 25 adam jumys istep jatyr. Bul nysannyń tótenshe mańyzdylyǵyn eskere otyryp, oblys ákimi tartylǵan jumysshylar sanyn kóbeıtýdi jáne sáıkesinshe nysandy paıdalanýǵa berý kestesin qaıta qaraýdy tapsyrdy.
- Bul ǵımarat búginde búkil óńir úshin asa qajet. 25 adam jyldyń aıaǵynda ǵımaratty salyp beredi dep kúte almaımyz. Qurylysshylar sanyn 3-4 esege arttyryp, kestelerdi qaıta qarap shyǵyńyz, - dedi Ábilqaıyr Sqaqov. - Ár apta saıyn munda qurylys barysyn únemi belgilep otyratyn jáne onyń sapasyn baqylap otyratyn monıtorıng toby kelip turady.
