Ábilqaıyr Sqaqov Pavlodarda jylý jelilerin jóndeıtin brıgadalar sanyn arttyrýdy tapsyrdy
Pavlodar qalasynyń ákimi Erjan Imanslıamnyń málimeti boıynsha qazirgi kezde 1145 kópqabatty turǵyn úı (90%) jylý júıesine qosylǵan, 1165 – i (90% - dan astam) ystyq sýmen qamtamasyz etilgen. Qazir 112 úı jylýsyz, 69 úı ystyq sýsyz qalyp otyr. Jylýdyń bolmaýynyń basty sebepteriniń biri - jylý jelilerindegi apattyq jaǵdaılar. 36 úı PIK-tiń daıyn bolmaýyna baılanysty jylýsyz qalyp otyr.
Qalǵan 20 úı «Dachnyı» shaǵyn aýdanynda ornalasqan. Erjan Imanslıamnyń esebi boıynsha, munda barlyq jóndeý jumystary aıaqtalǵan, qazir júıeni sýmen toltyrý júrip jatyr. Qala ákiminiń aıtýynsha, «Dachnyı» shaǵyn aýdanynyń turǵyndary jylýǵa 5 qazannan bastap qosylady.
Oblys ákimi ásirese «Dachnyı» shaǵyn aýdanynyń turǵyndarynan shaǵym kóp túsetinin atap ótti. Ábilqaıyr Sqaqov qala basshysyna osy shaǵyn aýdannyń turǵyndarymen kezdesip, olardyń úıleri boıynsha aǵymdaǵy jaǵdaı týraly habarlaýdy tapsyrdy.
Sonymen qatar, aımaq basshysy jelilerdegi apattardyń saldaryn joıý boıynsha jumysty uıymdastyrýdy qatań synǵa aldy. «Pavlodar jylý jelileri» JShS basshylyǵy buǵan tótenshe jaǵdaılardy joıý úshin jumysshylar jetispeıdi degen ýáj aıtty.
- Pavlodar boıynsha jylýdy qalypty iske qosý úshin 20 kún qajet, al jylytý maýsymy bastalǵannan beri 12-shi kún ótti, - dep túsindirdi «Pavlodarenergo» AQ basshysy Oleg Perfılov. - Sonymen qatar, biz jóndeý jumystaryn karantınge baılanysty keıinge shegerip, bir aı keıin bastaǵanymyzdy umytpaýymyz kerek.
Oblys ákimi táýekelderdi josparlaý men boljaýdyń joqtyǵyn atap ótip, onyń dálelderin negizsiz dep tapty. Ábilqaıyr Sqaqov jylý berýshi uıym jóndeý býyndarynyń sanyn kóbeıtip, táýlik boıy jumys rejımine kóshýin talap etti. Ol óziniń birinshi orynbasary Suńǵat Esimhanovqa beıindi qyzmettermen birlesip, jylý jelileriniń tozýy turǵysynan problemalyq aımaqtardy anyqtaýdy jáne olarǵa turaqty baqylaý ornatýdy tapsyrdy.
