Ábilqaıyr Sqaqov Aqsýda qala tirshiligin qamtamasyz etetin nysandardy aralady
PAVLODAR. QazAqparat - Pavlodar oblysynyń ákimi Ábilqaıyr Sqaqov qala tirshiligin qamtamasyz etetin kásiporyndar men nysandardy aralady, dep habarlaıdy QazAqparat.
«Eýroazııalyq energetıkalyq korporatsııa» AQ quramyna kiretin Aqsý elektr stansasynda óńir basshysyna №5, №6 jáne №7 energobloktardyń jumysy týraly aıtyldy.
Kásiporynda 375 myń tonna kómir qory bar, ol qazirgi júktememen 17 kúnge jetedi.
Oblys ákimine Aqsý ferroqorytpa zaýytynyń aýmaǵyndaǵy qazandyqtaǵy jylytý maýsymynyń barysy týraly baıandady.
Búginde kásiporyn táýligine 700 tonnaǵa jýyq kómir jumsap, shtattyq rejımde jumys isteıdi.
- Bastapqyda bul qazandyq zaýytty jylytýǵa arnalǵan bolatyn. Óndiriletin jylýdyń kóp bóligin qalaǵa berý úshin biz kásiporynda jylý júıesin jańarttyq jáne zaýyttyń jartysyn óndiristen artylatyn ferrogaz esebinen jylytyp otyrmyz, - dep habarlady AFZ basshysy Sergeı Prokopev.
Ábilqaıyr Sqaqov qalalyq bılik organdaryna Aqsý qalasynyń jylýmen jabdyqtalýyn únemi baqylap otyrýdy jáne turǵyn úılerdegi jylý jetkiliksizdiginiń árbir faktisin páter ıeleri kooperatıvterimen pysyqtap otyrýdy tapsyrdy.
- Keıbir PIK tóraǵalarynyń qyzmeti búginde asa belsendi emes. Bir úıdiń jartysy salqyn, jartysy jyly bolyp ta jatady. Bul rette qyzmet kórsetetin uıymdardyń basshylary qysqy kezeńde táýlik boıy jumys isteýge tıis bolsa da, aýlaq otyrady, - dedi óńir basshysy.
Oblys ákimi qalany jylýmen qamtamasyz etip otyrǵan magıstraldegi qysymdy arttyratyn sorǵy stantsııasyn da aralady.
Avtomattandyrylǵan stantsııa aınalym rejıminde jumys isteıdi.
«Aqsý sý arnasy» kommýnaldyq kásipornynyń sý tazartý stantsııasynda Ábilqaıyr Sqaqovqa qalany sýmen jabdyqtaý týraly aıtyldy.
Munda táýlik boıy óz zerthanasy jumys isteıdi, onda taldaý júrgizý úshin sý saǵat saıyn alynady. Kásiporyn basshylyǵy Aqsý sý qubyry jelileriniń 60%-y tozǵan dep habarlady.
Búginde mamandar tozyǵy jetken ýchaskelerdi anyqtap, olardy qaıta qurý úshin jobalaý-smetalyq qujattamany jasap jatyr.
