Ábilhan Amanqul álem chempıonatynyń kúmis júldesin qanaǵat tutty
ASTANA. QazAqparat - Germanııanyń Gambýrg qalasynda ótip jatqan bokstan álem chempıonatynda 75 keli salmaq sanatynda judyryqtasqan Ábilhan Amanqul kúmis medaldi qanaǵat tutty, dep habarlaıdy QazAqparat.
Ábilhan álem chempıonatynyń aqtyq synynda Eýropa chempıony ýkraınalyq Aleksandr Hıjnıakpen judyryqtasqan bolatyn. 3 raýndtyq kezdesý tartysty ótip, boksshylar bir-birin alma-kezek aýyr soqqylardyń astyna alyp otyrdy. Jalpy jekpe-jek teń dárejede ótkenimen tóreshiler jeńisti ýkraınalyq boksshyǵa berdi. Osylaısha Ábilhan Amanqul alǵash ret qatysqan álem chempıonatynda kúmis júldeger atandy.
Alda 91 keli salmaq sanatynda Qamshybek Qońqabaev ázerbaıjandyq Magomedrasýl Mejıdovpen álem chempıony ataǵy úshin aıqasady.
Buǵan deıin 56 keli salmaq sanatynda jarys jolyna shyqqan boksshymyz Qaırat Eralıev amerıkalyq Dıýk Ragandy utyp, álem chempıony atanǵanyn habarlaǵan bolatynbyz.
Aıta keteıik, osyǵan deıin Gambýrgtegi álem chempıonatynda Jomart Erjan (49 keli), Vasılıı Levıt (81 keli) pen Abylaıhan Júsipov (69 keli) qola júldeger atanǵan edi.
