Ábilǵazy Qusaıynov óndiriste qaıǵyly oqıǵalardy azaıtýdyń jolyn kórsetti

ASTANA. QazAqparat  - QR Kásipodaqtar federatsııasynyń basshysy qazirgi zańnamada kórsetilgen múmkindikterdi barynsha paıdalanýǵa úndep otyr, dep xabarlaıdy QazAqparat tilshisi.

"Qazirgi kezde "Kásipodaqtar týraly" jańa zańnyń aıasynda árbir kásiporynda óndiristik keńester qurylyp jatyr. Atalǵan keńesterdiń qaýipsizdik sharalaryna qatysty barlyq sheshimderi mindetti túrde oryndalýy shart. Osy oraıda kásipodaqtardyń respýblıka boıynsha 12 myńdaı óndiristik keńesti qurǵanyn erekshe atap ótken jón. Árıne, barlyq máseleni bir kúnde sheshý múmkin emes. Degenmen, endigi kezekte kásipodaqtar jumys berýshige óndiristik keńester arqyly áser ete alady. Qaýipsizdik sharalary aıasynda texnıkalyq qural-jabdyqtardy jańartý talaby da mindetti túrde oryndalýy qajet", - dep atap kórsetti Qusaıynov búgin Astanadaǵy respýblıkalyq forým aıasynda.

Alaıda federatsııa basshysy tabıǵattyń tylsym kúshin de eskerý kerektigin jetkizdi. "Mysaly, jaqynda bolǵan apat kezinde metan gazy bir jerde jınalyp qaldy da, oqys jarylys boldy. Bul - tabıǵı nárse. Ókinishke qaraı, adam ony únemi baqylaı almaıdy. Osy ispetti jaǵdaılar qaıǵyly oqıǵalarǵa sebep bolyp jatady", - dep atap kórsetti uıym basshysy.

Aıta keteıik, 31 tamyzda "ArselorMıttal Temirtaý" kompanııasyna qarasty shaxtada óndiristik apat bolyp, úsh adam qaıtys boldy. Tótenshe jaǵdaı kezinde jerdiń astynda 136 adam bolǵan. Qaıtys bolǵandardyń deni - 31-36 jastaǵy jigitter.

 Foto  https://azh.kz