Ábilázovtiń Qazaqstannan basqa memleketke ekstradıtsııalanýy týraly aıtýǵa erterek - Bas prokýratýra
Búgin QR Bas prokýratýrasynda ótken brıfıng barysynda vedomstvonyń resmı ókili Nurdáýlet Súıindikov osylaı aıtty.
Resmı ókildiń sózine qaraǵanda, Ábilázovti ekstradıtsııalaý úderisi ádettegi merzimnen birneshe ýaqytqa sozylyp ketýi múmkin. «Jalpy aıyptalýshyny ekstradıtsııalaýda Qazaqstanǵa emes, basqa memleketke beretindigi týraly aıtýǵa erterek. Biz Ábilázovtiń dál Qazaqstanǵa berilýine tabandy kúsh jumsamaqpyz. Eń bastysy, Eýropalyq konventsııada ekstradıtsııalaý máseleleri rettelip otyr. Atap aıtsaq, qylmystyń aýyrlyǵy, onyń jasalý orny, tulǵanyń azamattyǵy qaperge alynatyn bolady. Osy rette qylmystyń negizgi bóligi men eń aýyry Qazaqstanda jasalǵanyn, urlanǵan qarajattyń qazaqstandyq banktiń aktıvterimen júzege asqanyn eske salǵym keledi. Budan bólek, Ábilázov myrza áli kúnge deıin Qazaqstannyń azamaty bolyp tabylady. Sondyqtan da, Qazaqstan eýropalyq konventsııanyń qatysýshysy bolmasa da elimizge qaıtarý týraly ótinishtiń oń sheshimine úmittenedi», - dedi resmı ókil.
Esterińizge sala keteıik, Frantsııa sotynyń úkimimen 40 kúnge qamaýǵa alynǵan M. Ábilázovti ekstradıtsııalaý týraly Qazaqstan, Reseı, jáne Ýkraına elderi ótinish jasaǵan.
