Abylaıhan Júzbaı: Qazaqstanda kerlıng sportyna arnalǵan muz aıdyny bolǵanyn qalaımyn
ASTANA.KAZINFORM — Astana qalasy «Saryarqa» muz aıdynynda kerlıng sportynan Qazaqstan chempıonaty óz máresine jetti. Osy oraıda, Kazinform tilshisi kerlıngten Qazaqstan ulttyq quramasynyń kapıtany Abylaıhan Júzbaımen sóılesip, «Muz ústindegi shahmat» atalǵan osy sporttyń elimidegi damýy týraly bilip qaıtqan edi.
Ulttyq qurama kapıtanynyń aıtýynsha, elimizde bul sport qazirgi ýaqytta jaqsy damyp kele jatyr.
— Qysqy Azııa oıyndarynan keıin kerlıng sportyna kóńil bólinip, jaqsy damyp kele jatyr. Bul jolǵy el birinshiligine 8 óńirden 100-dan asa sportshy qatysty. Qazirgi ýaqytta, federatsııa tıisti deńgeıde jumys istep jatyr, mınıstrliktende qoldaý bar, — dedi sportshy.
Onyń aıtýynsha, ár sporttyń damýy úshin jattyǵý bazasynyń mańyzy zor.
— Elimizde kerlıngke arnalǵan muz aıdyny bolǵanyn qalaımyn. Sportshylar tek respýblıkalyq birinshilikte ǵana bas qosyp, tájirıbe alamasamyz. Muz alańy bizdiń júıeli jattyǵýymyzǵa jáne joǵary deńgeıdegi jarystardyń ótýine septigin tıgizedi. Qazaqstan boıynsha 12 óńirde federatsııanyń óńirlik shtaby quryldy. Aldaǵy ýaqytta, otandastarymyzdyń osy sportqa qyzyǵýshylyǵy artady dep úmittenemin, — dedi Abylaıhan Júzbaı.
Kapıtan sonymen qatar ulttyq quramanyń halqaralyq jarystardaǵy nátıjesine toqtaldy.
— Qyıyndyqtarǵa qaramastan, halqaralyq jarystarda nátıjeli óner kórsetip júrmiz. Qytaıdyń Harbın qalasynda ótken qysqy Azııa oıyndarynda áıelder quramasy 4-oryn, al erler quramasy 5-oryn aldyq. Ótken jyly AQSh-ta ótken pankontınental dodasynda 2-oryn alyp, álem chempıonatynyń V pýlyna joldama aldyq. Sonymen qatar, Reseı elinde ótken halqaralyq jarystarǵa jıi shaqyrtý alyp, úzdik nátıje kórsetip júrmiz, — dedi ol.
Sóz sońynda, Abylaıhan Júzbaı 2029 jylǵy Almatyda ótetin qysqy Azııa oıyndaryn asyǵa kútip otyrǵanyn jasyrmady.
— Bul biz úshin óte jaqsy múmkindik, óz elimizde jeńiske jetsek dep maqsat qoıyp otyrmyz. Sol úshin aldaǵy jarystarǵa belsene qatysyp, jaqsy daıyndyq jasaýǵa tyrysamyz, — dedi kapıtan.
Eske sala ketsek, Kerlıngten Qazaqstan chempıonaty 18 aqpannan 27 aqpan aralyǵynda Astana qalasyndaǵy «Saryarqa» muz aıdynynda ótip jatyr. Baıraqty básekege elimizdiń 8 óńirinen 100-den astam sportshy qatysty.
Chempıonat Ulttyq quramany jasaqtaý, halyqaralyq jarystarǵa irikteý jáne kerlıng sportyn óńirlerde damytý maqsatynda uıymdastyrylǵan.
Osyǵan deıin habarlaǵanymyzdaı, kerlıngten el birinshiliginde Astana qalasy aralas komandalyq jáne aralas juptyq synda top jardy.