Abylaıhan Jubanazar: Olımpıadada el senimin aqtasam deımin

QYZYLORDA. KAZINFORM - Qyzylordalyq dzıýdoshy Abylaıhan Jubanazar 2024 jylǵy Parıj Olımpıadasynda el namysyn qorǵaıdy. 

Abylaıhan Jubanazar 2000 jyldyń 15 aqpanynda Qyzylorda oblysy Qazaly qalasynda dúnıege kelgen. Sport jolyndaǵy alǵashqy qadamyn 2013 jyly qazaq kúresinen bastaǵan. Qazir dzıýdo kúresinen halyqaralyq dárejedegi sport sheberi ataǵyn alǵan.

«Otbasym jaıly aıtatyn bolsam, ákem Seıilbek Táshimov pen anam Janat Musaeva - qarapaıym eńbek adamdary. Ákem jeke mekemede júrgizýshi bolsa, anam aýrýhanada eńbek etedi. Ákem meniń sportpen aınalysqanymdy qalady. Tórtinshi synyp oqyp júrgende kúres zalyna alyp keldi. Sodan beri dzıýdonyń qyr-syryna qanyǵyp kelemin. Odan keıingi jyldarda Qyzylorda qalasyndaǵy Jalańtós bahadúr atyndaǵy oblystyq sportta daryndy sport mektebinde tálim aldym. Bapkerim - Qalen Qalıuly», - dedi Abylaıhan.

Abylaıhan 2022 jylǵy Azııa oıyndarynda qolaǵa qol sozsa, byltyr ótken «Grand Slam» týrnırlerinde kúmis jáne qola medal ıegeri atandy. Sondaı-aq, bıyl «Qazaqstan barysy týrnırinde úzdik úshtikten kórindi. 2022 jyly. Qorqyt Ata ýnıversıtetınde dene shynyqtyrý mamandyǵy boıynsha bitirip shyqty.

«Olımpıada – árbir sportshynyń armany. Aldymda asqaq arman bar. El namysyn abyroımen qorǵasam degen maqsatym bar» , – deıdi sportshy.

Frantsııa astanasy Parıj qalasynda Jazǵy Olımpıada oıyndary 26 shilde men 11 tamyz aralyǵynda ótedi. Oıyndarǵa álemniń 205 elinen 10 500 sportshy qatysady dep josparlanǵan. Onda 32 sport túrinen 329 medal jıyntyǵy sarapqa salynady.

Dzıýdodan Qazaqstan quramasy sapynan Parıj Olımpıadasynda 8 sportshy tatamı tórinde taıtalasqa túsedi. Olardyń qatarynda Eldos Smetov (60 keli), Ǵusman Qyrǵyzbaev (66 keli), Danııar Shamshaev (73 keli), Abylaıhan Jubanazar (81 keli), Nurlyhan Sharharn (100 keli), Abıb Ábýjaqynova (48 keli), Esmıgýl Kýıýlova (63 keli), Kamıla Berliqash (78 keliden joǵary) bar.

Eske salsaq, Qyzylorda oblysynan Parıj Olımpıadasyna tórt sportshy barady.

Aıta ketsek, buǵan deıin 2012 jyly qyzylordalyq Marına Volnova (75 keli) áıelder boksynda qola júldege qol sozdy. 2016 jyly aýyr atletıkadan Aleksandr Zaıchıkovtiń (105 keliden joǵary) kúmis júlde aldy. Al 2020 jyly boksshy Qamshybek Qońqabaev (91 keli) úzdik úshtikti túıindedi.

Sondaı-aq, oblystan dzıýdoshy Janar Janzunova, taekvandoshy Aınur Esbergenova, gandboldan ulttyq qurama sapynda qyzylordalyq sportshylardyń el namysyn qorǵap qaıtqanyn jerlesteri áli umyta qoıǵan joq.