Abylaıhan Jubanazar Astanadaǵy týrnırde qola júldeger boldy

ASTANA. KAZINFORM — Qazaqstandyq Abylaıhan Jubanazar (81 keli) Astanada ótip jatqan dzıýdodan Qazaqstan Barysy Grand Slam týrnırinde qola medal jeńip aldy.

Tájirıbeli balýan 3-oryn úshin ótken sheshýshi beldesýde ıtalııalyq Manýel Parlatıdi 29 sekýndta jeńip, el qorjynyna altynshy medaldy saldy.

Aıta ketsek, jarystyń alǵashqy kúni, 9 mamyrda Ǵusman Qyrǵyzbaev (66 keli) pen Talǵat Orynbasar (60 keli) kúmis alsa, Aman Baqytjan jáne Maǵjan Shamshadın qola júldege qol sozdy.

Sondaı-aq olardyń qataryna búgin qola medal alǵan Eset Qýanov (73 keli) qosyldy.

Atalǵan jarys nátıjesinde IJF erejelerine sáıkes jarystyń jeńimpazdary men júldegerleri arasynda álemdik jáne olımpıadalyq reıtıngilerde upaılar bólinedi. Atap aıtqanda, І oryn úshin — 1 myń, kúmis júldegerge — 700, al qola medal alǵanǵa 500 upaı esepteledi.