Abylaı Myrzahmetov shartty túrde merziminen buryn bosatýdy surap otyr

PAVLODAR. KAZINFORM — «Atameken» UKP-nyń burynǵy tóraǵasy, alaıaqtyq úshin sottalǵan Abylaı Myrzahmetov shartty túrde merziminen buryn bosatýdy surady.

— Sottalýshy Abylaı Myrzahmetovtiń ótinishhaty Pavlodar qalasynyń qylmystyq ister jónindegi aýdanaralyq sotyna tústi. Onda shartty túrde merziminen buryn bosatýdy suraǵan. Ótinishhat 2 mamyrda tirkeldi. Zań boıynsha bir aı merzim ishinde qarastyrylady, — dep habarlady Pavlodar oblystyq sotynyń baspasóz qyzmetinen.

Aıta keteıik, Abylaı Myrzahmetov Pavlodar oblysyndaǵy № 46 túzeý mekemesinde jazasyn ótep jatyr. Bir apta buryn Bas prokýratýra atalǵan kolonııada túsirilgen beınematerıaldy jarııalady. Onda bıg-beg qaptaryn shyǵaratyn óndiris iske qosylǵany kórsetilgen.

Vedomstvonyń málimetinshe, jańa óndiris № 46 túzetý mekemesinde iske qosylǵan. Qajet jabdyqtar men jumys oryndaryn kásipkerler qamtamasyz etken.

Eske sala keteıik, 13,9 mlrd jymqyrǵan Abylaı Myrzahmetov 5 jylǵa bas bostandyǵynan aıyryldy.

Al bıylǵy qańtar aıynda Pavlodar soty Abylaı Myrzahmetovtiń jazasyn jeńildetýden bas tartty.