Abylaı Myrzahmetov isi: Prokýror sotty jabyq rejımde ótkizýdi usyndy

ASTANA. KAZINFORM — Elordada «Atameken» ulttyq kásipkerler palatynyń burynǵy tóraǵasy Abylaı Myrzahmetovtiń isine qatysty basty sot otyrysy ótip jatyr. Prokýror sotty jabyq rejımde ótkizýge ótinish berdi.

— Joǵarǵy sottyń 2002 jylǵy 26 jeltoqsandaǵy normatıvtik qaýlysynyń 6-tarmaǵyna sáıkes jarııalylyqqa tyıym salý týraly ótinish Qylmystyq-protsessýaldyq kodekstiń 29-babynyń 1-bóligi boıynsha jábirlenýshilerdiń, kýágerlerdiń, otbasy músheleri men jaqyn týystarynyń qaýipsizdigin qamtamasyz etý qajet kezde ǵana qanaǵattandyrylýǵa tıis. Kodekstiń 29-babynyń 1-bóligine sáıkes sot talqylaýynyń jarııalylyǵyn shekteýge jábirlenýshiniń, kýágerlerdiń, jaqyn týystary men sot otyrysyna qatysatyn basqa da adamdardyń qaýipsizdik múddesin talap etken jaǵdaıda jol beriledi, — dedi prokýror Baýyrjan Shekenov.

Sondaı-aq, prokýror Qylmystyq protseske qatysatyn adamdardy memlekettik qorǵaý týraly zańnyń 7-babyna sáıkes qorǵalatyn adamdardyń jeke jáne múliktik qaýipsizdigin qamtamasyz etý maqsatynda protsesti júrgizetin organ jabyq sot talqylaýyn júrgizý kezinde qaýipsizdik sharalaryn qoldanýǵa quqyly ekenin aıtty.

Búgin Astanada «Atameken» ulttyq kásipkerler palatasynyń burynǵy basshysy Abylaı Myrzahmetov isine qatysty basty sot otyrysy ótip jatyr.

Sýdıa protsesti foto, vıdeoǵa túsirýge tyıym saldy.

Eske sala keteıik, «Atameken» ulttyq kásipkerler palatasynyń burynǵy tóraǵasy Abylaı Myrzahmetov ótken jyly 10 mamyrda ustalǵan edi. 

Antıkor taratqan aqparatqa sáıkes, ol alaıaqtyq jáne kásipkerdi týysyn qylmystyq jaýapkershilikten bosatýǵa járdemdeskeni úshin asa iri kólemde para berýge ıtermeledi degen kúdikke ilikti.

2023 jyly 22 qarashada agenttik Abylaı Myrzahmetovke qatysty tergeý jalǵasyp jatqanyn habarlady.  

«Atameken» UKP eks-basshysyna qatysty is byltyr 21 jeltoqsanda sotqa jetti.