Ábıba Ábýjaqynova men Maǵjan Shamshadın Grand Slam týrnıriniń qola júldegeri atandy
ASTANA. QazAqparat – Qazaqstandyqtar Ábıba Ábýjaqynova men Maǵjan Shamshadın Grýzııa astanasy Tbılısıde ótip jatqan dzıýdodan Grand Slam týrnıriniń qola júldegeri atandy, dep habarlaıdy QazAqparat tilshisi.
Qazaqstan dzıýdo federatsııasynyń baspasóz qyzmetinen málim etkendeı, jarystyń alǵashqy kúni Ábıba 48 kelige deıingi salmaqta qola júlde úshin básekede ıspanııalyq Laýra Martınezben beldesti.
Qazaqstandyq dzıýdoshy qarsylasyn vazarı ádisimen utyp, úzdik úshtikke ilikti.
Ábıba Ábýjaqynova doda barysynda barlyǵy 4 kezdesý ótkizdi. Óz tobynan úzdik shyqqan ol jartylaı fınalda jarys jeńimpazy, serbııalyq Mılısa Nıkolıchke jol berdi.
Bul – Ábıbanyń bıylǵy álemdik týrnırlerdegi úshinshi medali. Osyǵan deıin Portýgalııada ótken Gran-prıde altyn, Frantsııada Grand Slam jarysynda qola júlde jeńip alǵan edi.
Taǵy bir qazaqstandyq Maǵjan Shamshadın 60 kelige deıingi salmaqta qola medalǵa ıe boldy. Ol jubanysh fınalynda otandasy Qanat Seıilhandy utty.
Foto: Qazaqstan dzıýdo federatsııasy
