Ábıba Ábýjaqynova Astanada ótetin Qazaqstan Barysy Grand Slam jarysyna qatyspaıtyn boldy
ASTANA. QazAqparat - Ábıba Ábýjaqynova dzıýdodan Astanada ótetin Qazagstan Barysy Grand Slam týrnırine qatyspaıtyn boldy. Bul týraly Qazaqstan dzıýdo federatsııasynan málim etti, dep habarlaıdy QazAqparat tilshisi.
Resmı málimdemege sáıkes Ábıba komandanyń medıtsına mamandarynyń usynysy boıynsha atalǵan jarystan tys qalyp otyr.
«Tashkentte ótken álem chempıonatynda alǵan jaraqatynan (ıyǵy) tolyq aıyqqan joq. Jaraqatymen kúresse, ony asqyndyryp alý qaýpi bolǵandyqtan, Ábıbany álemdik jarysqa qatystyrmaý týraly sheshim qabyldandy», dep habarlady vedomstvodan.
Á.Ábýjaqynova Tashkenttegi álem chempıonatynda jartylaı fınalda jáne qola júlde úshin básekede qarsylastaryna jol berip, besinshi orynmen shektelgen bolatyn. Al ótken jyly álem birinshiliginde qazaq qyzdary arasynan tuńǵysh ret qola júldeger atanǵan edi.
Eske sala keteıik, budan buryn Ábıba Ábýjaqynovanyń álemdik Grand Slam týrnıriniń qola júldegeri atanǵanyn jazǵan bolatynbyz.
