Ábıba Ábýjaqynova sońǵy lıtsenzııalyq jarystan nege shettetilgenin túsindirdi
ASTANA. KAZINFORM – Dzıýdodan Qazaqstan ulttyq quramasynyń úzdik sportshysy Ábıba Ábýjaqynova Astanada 10-12 mamyr kúnderi ótetin Qazaqstan Barysy Grand Slam álemdik jarysynan ne sebepti shettetilgenin aıtyp berdi.
«Óz elimizde, elordamyzda ótetin, jergilikti jankúıerler aldynda Olımpıada oıyndaryna sońǵy lıtsenzııa beretin mańyzdy dodadan shet qalyp jatqanym árıne, qıyn. Biraq, jankúıerlerim alańdamasa eken deımin. Men eń bastysy Parıj olımpıadasynyń joldamasyna qol jetkizip turmyn. Olımpıada oıyndaryna álemdik reıtıngide alǵashqy 17 orynda turǵan sportshylar barýǵa múmkindik alady. Al men óz salmaǵymda 3 orynda kele jatyrmyn. Osyǵan baılanysty Ulttyq quramanyń bas bapkeri men jeke jattyqtyrýshym aqyldasa kele sońǵy lıtsenzııalyq týrnırden bosatty. Esesine, jaqynda ótetin álem birinshiligine qatysatyn bolyp jatyrymyn», - dedi Kazinform tilshisine bergen suhbatynda Ábýjaqynova.
Esterińizge sala keteıik, búgin Astanada 10-12 mamyr kúnderi ótetin Qazaqstan Barysy Grand Slam álemdik jarysyna qatysatyn Qazaqstan quramasynyń tatamı sheberleri belgili bolǵan edi.
Alaıda, áıelder quramasynan Ábıba Ábýjaqynovanyń esimin kóre almaǵan edik. Bul salmaqta Astanada Ǵalııa Tynbaeva, Dıana Býrkeeva, Alıra Shegelekova jáne Jibek Jaqsybaı synǵa túsedi.
Aıta keteıik, jarys qojaıyny retinde Qazaqstan ǵana ár salmaqta 4 dzıýdoshydan qosa alady. Barlyǵy Jaqsylyq Úshkempirov atyndaǵy jekpe-jek saraıynyń tatamıinde 86 memleketten kelgen 400-den astam sportshy kúsh synasady. Qazaqstan Barysy Olımpıada reıtınginde upaı beriletin sońǵy Úlken Dýlyǵa týrnıri bolmaq.
