Ábıba Ábýjaqynova maýsymdy álemdik reıtınginiń birinshi satysynda aıaqtady
ASTANA. KAZINFORM - Dzıýdodan sporttyq maýsym aıaqtaldy. Álemdik týrdaǵy sońǵy jarys Japonııanyń Tokıo qalasynda ótken Grand Slam týrnıri boldy.
Qazaqstan quramasy bul jarysqa qatysqan joq. Alaıda bul Ábıba Ábýjaqynovanyń álemdik reıtıngidegi kóshbasshylyq ornyn saqtap qalýyna kedergi keltirmedi.
QR UOK málimetinshe, jyl sońynda qazaqstandyq sportshynyń enshisinde 5096 upaı bar. Ol 48 kelige deıingi salmaq dárejesinde reıtınginiń birinshi satysynda tur.
Ókinishke qaraı, basqa qazaqstandyq dzıýdoshylardyń eshqaısysy úzdik ondyqqa ene almady. Degenmen Ǵusman Qyrǵyzbaev (66 kelige deıin) pen Abylaıhan Jubanazar (81 kelige deıin) bul mejege jaqyn bolǵan edi. Ekeýi de 14-orynda tur.
Aıta keteıik, bıyl Ábıba Ábýjaqynova Vengrııanyń Býdapesht qalasynda ótken álem chempıonatynda kúmis medal jeńip aldy.
Eske salsaq, álem chempıony atanǵan Abylaıhan Júsipov endigi josparyn aıtty.
