Abhazııa jáne Ońtústik Osetııadan ákelingen kólikterdi qalaı zańdastyrýǵa bolady

NUR-SULTAN. QazAqparat - Qazirgi kezde Abhazııa jáne Ońtústik Osetııa avtokólik quraldaryn satyp alý múmkindigine qatysty el halqy qyzyǵýshylyq bildirýde. Osy avtokólik quraldaryn satyp alyp, elimizdiń aýmaǵynda erkin júrý úshin zańdastyrýǵa bola ma? QR QM Memlekettik kirister komıtetinde osy suraqqa jaýap berdi, dep habarlaıdy QazAqparat.

«Atalǵan avtomashınalar Eýrazııalyq ekonomıkalyq odaqtyń (EAEO) kedendik aýmaǵyna Reseıdiń ótkizý pýnktteri arqyly ýaqytsha ákelinedi, olar óz mártebesi boıynsha sheteldik taýarlar bolyp sanalady (ıaǵnı EAEO taýarlaryna jatpaıdy) jáne kedendik baqylaýda bolady. Eger kólik quralynyń ıesi Abhazııa, Ońtústik Osetııa zańdy tulǵasy bolsa - kólik quralynyń kedendik deklaratsııasy (KQKD), al eger kólik quralynyń ıesi osy aýmaqtardyń rezıdent jeke tulǵalary bolyp sanalsa - jolaýshylar kedendik deklaratsııasy (JKD) ýaqytsha ákelýdi rastaıtyn qujat bolady», - dep eskertti Memlekettik kirister komıtetinde.

EAEO Keden kodeksiniń 264-babynyń 6-tarmaǵyna jáne 275-babynyń 2-tarmaǵyna sáıkes, ýaqytsha ákelingen kólik quraldary EAEO kedendik aýmaǵynda deklaranttyń, ıaǵnı kólik quralyn ákelgen tulǵanyń, naqty menshiginde jáne paıdalanýynda bolýy kerek.

Degenmen, búgingi tańda Abhazııa jáne Ońtústik Osetııadan ýaqytsha ákelingen kólik quraldary EAEO kedendik aýmaǵynda bolǵan kezeńde, zańmen belgilengen shekteýdi buza otyryp, senimhat boıynsha (ıelený, ıelikten shyǵarý quqyǵymen) Qazaqstan Respýblıkasynyń azamattaryna satý oryn alǵany belgili.

Vedomstvo dereginshe, Abhazııa jáne Ońtústik Osetııanyń tirkeý nómirlik belgileri bar kólik quraldaryn EAEO kedendik aýmaǵyna ákelýdi ári Qazaqstan Respýblıkasynyń rezıdentterine berýdi júzege asyrǵan tulǵalardyń, sondaı-aq memleketke keltirilgen zalal somasyna qaraı kedendik tólemderdi tólemeı jáne Qazaqstan aýmaǵynda paıdalaný maqsatynda osyndaı kólik quraldaryn satyp alǵan tulǵalardyń áreketteri qylmystyq nemese ákimshilik quqyq buzýshylyq sıpatqa ıe.

«Osyǵan oraı, QR QM Memlekettik kirister komıteti Qazaqstannyń barlyq azamattaryna Abhazııa jáne Ońtústik Osetııa tirkeýinde turǵan ári ýaqytsha ákelingen kólik quraldaryn satyp alǵan jaǵdaıda, kedendik tazartýdan ótkizip, kedendik bajdar men salyqtardy tólegennen keıin ǵana Qazaqstan aýmaǵynda atalǵan kólik quraldaryn paıdalanýǵa bolatynyn eskertedi», - dep atalyp ótken komıtet habarlamasynda.